Байрым кюн Нальчикде  Ата журтлуланы лагери кесини ишин башлагъанды. Быйыл ол 5 августха дери ишлерикди. Анга  Херсон областьда, Моздокда, Ставрополь крайда эмда Тюркде жашагъан сабийле чакъырылгъандыла. Битеу да бизни республикада солурукъланы саны 55-ге жетеди. 
Эсигизге салайыкъ, бу проектни КъМР-ни Миллетлени ишлери  эмда жамауат проектле жаны бла министерствосу  бардырады. Бу жол бла ол 10 кере къуралгъанды. 
Лагерьни къууанчлы ачылыуу уа «Синдика» къонакъ юйде болгъанды. Министр Анзор Курашинов билдиргеннге кёре, лагерьни ишине тыш къыраллада жашагъан ата журтлуларыбыз   къатышырларын излей, быйыл ала «Эльбрусоид» фондну эм МЧА-ны юслери бла анда жашагъанла бла байлашхандыла. 
Сабийлени харкюнлюк программаларын былтыргъыны мурдорунда къурагъандыла. Быйыл ала Къабарты-Малкъарны  ариу жерлеринде боллукъдула, музейледе  тарых  кёрмючле бла шагъырейленирикдиле, миллет тепсеулеге да юйренирикдиле.
– Бу проектни бардырыуну баш магъанасы жаш тёлюню арасында шуёхлукъ, байламлыкъ тохташдырыуду. Нальчикге жыл санлары 15-20 болгъан жаш тёлю келгенди. Ала бир бирлери бла танышып, бир бирлерини маданиятларын билселе, мындан ары ол жер юсюнде мамыр жашауну сакълаугъа себеплик этерикди, – деп чертгенди министр.  
  Билдиргенлерине кёре, министерство «Эльбрусоидни» юсю бла Къазахстанда жашагъан таулуланы келечилери да келирлерин излеген эди. Алай ол къыралдан ыразылыкъ жууап келмегенди. 

Къасымланы Аминат.