КъМР-ни саулукъ сакълау министри Рустам Калибатов Республиканы клиника больницасында   тынгылы ремонт этилгенден сора тюрлениулеге къарарча реабилитация бёлюмюнде болгъанды.  Аны чеклеринде тамамланнган жумушлагъа багъа бичгенди, ишине къарагъанды эм саусузла бла да тюбешгенди.

Бусагъатда мында палаталада 15 адамгъа жатар жер барды. Ала инсультдан сора реабилитация ётген эм ара нерва системалары ауругъанладыла.  
Былтыр жылны ахырында «Саулукъну терк кючлерча медицина реабилитация бардырыу» федерал проектге кёре арагъа жангы медицина оборудование алыннганды. Ол санда автомат халда ишлеген «Lokomat» медицина комплекс, велоэргометрле, къоллагъа бла аякълагъа терапия бардыргъан аппаратла, мульти-тренажёрла эм физиотерапия оборудование да.

Сагъынылгъан кезиуде стационарда эки жюзден аслам адамгъа къаралгъанды. Ала тренажёрланы да тири хайырланнганларын энчи белгилерчады. 
Оборудованияны хайыры бла тийишли халда реабилитация бардырыргъа онг барды. Аны себеплиги бла онгсузланы арасында сакъатлыкъдан иги кесек инсан сакъланады эм чархларын тирилтирге да онг табадыла.

Алай бла бюгюнлюкде РКБ тийишли медицина оборудованиясы бла федерал аралагъа оздурмайды. Мында саусузгъа качестволу диагностика, операция этиледи эм реабилитация бардырылады.
Комплексли реабилитация технологияны баш магъанасы хар саусузгъа энчи халда болушлукъ тапдырыргъады. Къабарты-Малкъарны келечилери борчлу халда медицина страховкалары бла кеслерине мында хакъсыз къаратыргъа боллукъларын да энчи белгилерчады. 

Курданланы Сулейман.