Россей Федерацияны  Правительствосуну Председателини биринчи орунбасары Андрей Белоусов кёп болмай бардыргъан кенгеш гитче эм орта предпринимательлеге  болушлукъ  тапдырыугъа жораланнганды.  Анга  видео амал бла КъМР-ни Правительствосуну Председателини биринчи орунбасары  Муаед Кунижев, экономиканы айнытыу министрни орунбасары, гитче эм орта  предпринимательликни бла конкуренцияны айнытыу департаментни таматасы  Ольга Белецкая,  гитче эм орта предпринимательликни институтларын айнытыу жаны бла бёлюмню таматасы Адана Гятова да къатышхандыла.

Тюбешиуде «Гитче эм орта  предпринимательликге эм кеслери бир тюрлю иш бла кюрешгенлеге болушлукъ тапдырыу» миллет проектге  кёре тамамланнган эм 2025 – 2030 жыллада  бардырыллыкъ ишле сюзюлгендиле. Ол санда къыралны субъектлеринде МСП бёлюмде уруннганланы болумларына  эм айнытырча не мадар этилгенине да  эс бурулгъанды. РФ-ни Экономиканы айнытыу министерствосуну инвестиция политика  бла  гитче эм орта  предпринимательликни айнытыу департаментини таматасы Инна Дадаян 2025-2030 жыллада къаллай проектле  бардырыллыкъларын билдиргенди, бёлюмде уруннганланы санын келтиргенди, бюгюнлюкде алагъа къаллай тыйгъычлагъа тюберге тюшгенин  эм аланы кетерирча онгланы да эсгертгенди.     
Эсге сала айтсакъ, быйыл жылны биринчи жарымында республиканы гитче эм орта предпринимательлерине  болушлукъгъа 858 миллион сом чакълы берилгенди. Алай бла бюгюнлюкде предпринимательле учуз кредитлени,  поручительстволаны эм грантланы тири хайырланадыла деп, таукел айтыргъа боллукъду. Банкла, ёнкючле берген эм гарантиялы организацияла  да бардыргъан тюрлю-тюрлю программала ишлейдиле.   Ол санда РФ-ни Экономиканы айнытыу министерствосуну 1764 программасына кёре  475,0 миллион сом ёнкюч бериуню юсюнден 43 келишим этилгенди. Дагъыда кредитле алыргъа кёллендириуню программасыны чеклеринде субъектледен бири бла келишим этилип, 100  миллион сом берилгенди. 
Андан сора да, тогъуз  предпринимательге 52,2 миллион сом тёленнгенди. «Къабарты-Малкъар Республиканы Гарантиялы Фонду» коммерциялы болмагъан организация 37 чакълы  гитче эм орта предпринимательге кредит алыргъа 39 кере себеплик этгенди. Дагъыда КъМР-де гитче эм орта предпринимательстволукъгъа гитче кредитле берген фондуну хайырындан 16,1 миллион сомгъа 49 ёнкюч алыннганды.  
Быйыл жылны биринчи жарымында 129 субъект сатыу-алыу бардырыргъа  3,7 миллиард сомгъа 403 келишим этгендиле.  
Алай бла Къабарты-Малкъарда предпринимательликни айнытыу жаны бла танг кесек къыйматлы программа ишлейди эм власть органланы, тийишли ведомстволаны бла финанс учрежденияланы жанындан да дайым  болушлукъ тапдырылады. 

Курданланы Сулейман.