Къабарты-Малкъарны Регионнга оноу этиу арасы (ЦУР) жыл башланнганлы 12 466 чакълы тилекге бла тарыгъыугъа къарагъанды. Аланы асламысы «Telegram», «Одноклассники, «ВКонтакте» социал сетьледен «Инцидент Менеджмент» амал бла алыннганладыла. Кёбюсю, хар замандача, социал къоруулау, жашау журт-коммунал мюлк, тийрелени игилендириу, жолланы тапландырыу, саулукъ сакълау эм башха ишле бла байламлыдыла. Аланы хар бирине специалистле тынгылы къарап, магъаналары кёре тийишли ведомстволагъа билдиредиле.
Алгъын жууап берилирин бир сагъат сакъларгъа тюшгени кёплеге тап болмагъанды. Энди уа, орта эсеп бла алып айтханда, отуз минутдан кёпге созулмай мадар этилгени ишни бютюн жетишимли бардырыргъа онг береди.
Жамауатны бла власть органланы араларында байламлыкъ къуралырына, кемчиликлеге эс бурулуруна эм алагъа кёре къысха заманда оноу этилирине энчи эс бурулады. Сагъынылгъан кезиуде ведомствола бла бирге районлада эркинликсиз зыбыр къалгъан-къулгъанла тёгюлген жерле кетерилгендиле, ичер суу бла жалчытырча, кече жарыкъ болурча, кёп фатарлы юйлеге тийишли халда жылыу берилирча этилгенди эм кёп башха жумуш тамамланнганды.
ЦУР «Жарсыула» рубриканы да тири бардырады. Алты айгъа анга 24 спикер къатышханды, ол санда федерал ведомстволаны келечилери, министрле, жер-жерли администрацияланы и эм башха учрежденияланы келечилери. Аны чеклеринде социал, экономика, билим бериу, саулукъ сакълау, туризм эм башха бёлюмле бла байламлы юч жюзге жууукъ тилек бла тарыгъыу сюзюлгенди.
Эсге сала айтсакъ, бюгюнлюкде ЦУР къырал учрежденияланы социал сетьде бёлюмлерин бардырыу закон бла байламлы проектге да башчылыкъ этеди. Анга кёре, къырал органланы, ведомстволаны пресс-службаларына семинарла ётдюреди. Бусагъатда организацияланы, ведомстволаны, регион эм муниципал власть органланы аллай эки минг чакълы бёлюмлери ишлейди.
Дагъыда жамауатны эм бек жарсытхан соруулагъа жораланнган «Ангылатабыз, Къабарты-Малкъар» деген проект да хайырлылыгъын кёргюзтгенди. Аны чеклеринде эки жюз материал басмаланнганды. Ол иш бла жалчытыудан башлап импортну алышындырыугъа дери кёп тюрлю сорууланы кётюреди.
Эсге сала айтсакъ, Регионнга оноу этиу ара офис халда ишлемейди, «Инцидент менеджмент» бир тюрлю соруугъа эс бурур ючюн ол социал сетьлени биринде жазылыргъа керекди. Ол санда кемчилик тынгылылыракъ ачыкъланса игиди.
Магометланы Сулейман.
