Кёп болмай Орус география обществону "Тауланы хазнасы" деген жаш тёлю  илму   этнография  лагерини келечилери Черек районда туристле болуучу жерлени жокълагъандыла, ол санда   буруннгу эллеге бла эсгертмелеге да къарагъандыла.

Эм биринчи Нальчикден жаш тинтиучюле  Огъары Малкъарда болгъандыла,  Курнаят аскер- къаланы  къалгъан-къулгъанларына   къарагъандыла. Алагъа  Орус география обществону  «Альтаир» жаш тёлю клубуну таматасы Мокъаланы Тенгиз башчылыкъ этгенди.   

Ол алагъа Курнаят къала буруннгу элни тийресинде орналгъанын, оюлгъунчу алты кесекден къуралгъанын айтханды.  Аны арасында арбаз орналгъанды, аны кенглиги 10-12 метрге жетген арба   жол бла барыргъа болады.

Мокъаланы  Тенгиз айтханнга кёре, экспедиция тарых, архитектура жаны бла магъаналы эсгертмеле орналгъан жерледе ётеди. Аны чеклеринде тау бийикледе  республикалы эм  федерал даражалы   маданият жерлени  кёрюрге онг барды.   

Проект  регионла аралы кесекледен къуралады. Аны биринчи уруму июньда ётгенди. Бу  жол анга къыралны сегиз  субъектинден РГО-ну конкурсунда хорлагъан иги кесек адам къатышханды.

Жайны ахырына дери аны регион кесеги да ётерикди.  Анга да айырмалы  жаш тинтиучюле къошуллукъдула.

Жолоучулукъ тарыхдан, археологиядан, краеведениядан специалистлени башчылыгъы бла бардырылады.  Ала жаш адамлагъа жерлени юсюнден толу хапар билдиредиле эм сорууларына жууапла тапдырадыла. Андан сора да,  илму эм краеведение бёлюмлени келечилери бла тюбешиуле ётедиле.  

Жууукъ заманда уа  экспедицияны келечилери  Хулам-Бызынгы тарына атланырыкъдыла.