Дызэрыт илъэсым и гъатхэпэ мазэ закъуэм къриубыдэу Iуащхьэмахуэ лъапэм зыщагъэпсэхуащ цIыху мини 103-м щIигъум. «Iуащхьэмахуэ» курортыр къызэрызэIуахрэ ап­хуэдэ бжыгъэхэр абы и тхыдэм щыяпэу аращ. Иджыпсту бгы лъапэм щолажьэ кIапсэ гъуэгуи 5-рэ лыжэкIэ бгыщхьэм укъыщежэх хъуным хуэщIауэ гъуэгу 23-рэ. АтIэ, 2021 - 2023 гъэхэм я гъатхэпэ мазэхэм къриубыдэу ди деж зыщызыгъэпсэхуахэм я бжыгъэр, зэрызэкIэлъыкIуэм хуэдэу, мин 56-рэ, мин 58-рэ, мин 78-рэ хъуауэ аращ. 

Мыбы ипэкIэ щыIа рекордыр щагъэувауэ щытар 2023 гъэм и шыщхьэуIурщ: гъуэгугъэлъагъуэхэр зиIэ, километр 30 зи кIыхьагъ экологие лъагъуэщIэхэр щыпхашам щыгъуэщ. А ­лъэхъэнэм Iуащхьэмахуэ лъапэ зыщагъэпсэхуат цIыху мин 99-м. 
Урысей Федерацэм Экономикэ зыужьыныгъэмкIэ и министерствэмрэ «Кавказ.РФ» компаниемрэ зэгъусэу 2023 гъэм ирагъэжьащ «Iуащхьэмахуэ» курортым зегъэужьыным, абы и лэжьыгъэм зэхъуэкIыныгъэхэр хэлъхьэным, щIэм тету зэ­теухуэным ехьэлIа Iуэхугъуэшхуэхэр. Псалъэм папщIэ, лыжэкIэ къыщажыхь гъуэгухэм нэмыщI, гулъытэшхуэ хуащIащ «Азау» утыкур зэIузэпэщ щIыным, ар зыхуей хуэгъэзэным, туристхэм фIагъ лъагэ зиIэ Iуэхутхьэбзэхэр ягъуэтыным, машинэ гъэувыпIэхэр къызэгъэпэщыным, нэгъуэщIхэми. 
ЗэрытщIэщи, Iуащхьэмахуэ лъапэм нэхъыбэу зыIэпишэр лыжэкIэ къызэжыхьыну зыфIэфI туристхэрщ - псори зэхэту ди деж къэкIуэм и Iыхьэ щанэ мэхъу ахэр. Гуп-гуп зэрыгъэхъуауэ зыгъэпсэхуакIуэ къакIуэхэм щхьэкIэ Iуэхугъуэ щхьэхуэхэр къызэрагъэпэщ. Псалъэм папщIэ, кIапсэ гъуэгухэр щызэблэкI станцхэм деж теплъэ телъыджэхэр зиIэ сурэт техыпIэхэр ­хуагъэхьэзыращ, къуршыщхьэм зэрыдэкIуей ски-пасс би­летым и пIэкIэ банкхэм я картэхэр къагъэсэбэп хунущ. 
«Iуащхьэмахуэ лъапэм адэкIэ зедгъэужьын мурадкIэ, Кавказ.РФ-м и зэфIэкIыу хъуар зэуэ къызэдэдгъэсэбэпу, лэжьыгъэм яужь дихьащ икIи абы кърикIуахэр нобэ нэрылъагъущ.     Ар дэркIэ егъэлея е телъыджэ гуэру щыткъым, атIэ, щхьэж къылъыс и лэжьыгъэр игъэзэщIауэ аращ, дызыпэрыхьа Iуэхугъуэм фIы кърикIуэн папщIэ» , - жиIащ Кавказ.РФ-м и унафэщI Юмшанов Андрей. - Iуащхьэмахуэ лъапэм цIыхухэр иджыри къэкIуэнущ бадзэуэгъуэр икIыху, абы къыхэкIыуи, ди лэ­жьыгъэм кърикIуахэр зэхэтлъхьэжыну нобэкIэ пасэIуэщ. Иджырей гъэмахуэм дытепсэлъыхьу щытмэ, Хэку зауэшхуэр щекIуэкIа щIыпIэхэм ухуэзышэ экологие лъагъуэхэр едгъэ­фIэ­кIуэнущ, цIыхухэм я тыншыпIэр къызэгъэпэщыным хуэщIа лэжьыгъэхэми пытщэнущ». 
Апхуэдэуи абы къыхигъэщащ, «Лэжьыгъэм и Iэужь» лъэпкъ пэхуэщIэм ипкъ иткIэ лажьэ федеральнэ центрым и IэщIагъэлIхэр 2023 гъэм и кIэхэм щегъэжьауэ «Iуащхьэмахуэ» ­курортым зэрыщыIэр. Абыхэм я къалэн нэхъыщхьэр турист-хэм хуащIэ Iуэхутхьэбзэхэр егъэфIэкIуэнырщ. 
«Мамырыгъэ» кIапсэ гъуэгум хуэзэу лыжэкIэ туристхэм ­къыщажыхьыну гъуэгущIэхэр къыщызэIухыным ехьэлIауэ, Кавказ.РФ-м лэжьыгъэхэр ирегъэкIуэкI. 2026 гъэм ар ирагъэжьэну я мурадщ. Iуэхум къыхашащ мылъкушхуэ зыбгъэдэлъ резиденту 8. Иджыпсту абыхэм ягъэхьэзыр хьэ-­щIэщхэм, шхапIэхэм, нэгузегъэужьыпIэхэм я проектхэр. Псори зэхэту сом мелард 39-м щIигъу инвестицэ ахъшэу абы къы­халъхьэнущ. 
Дызэрыт илъэсым и япэ мазищым къриубыдэу туристу мин 238-м Iуащхьэмахуэ лъапэм зыщагъэпсэхуащ, ар процент 24-кIэ нэхъыбэщ къапщытэж лъэхъэнэм ирихьэлIэу нэгъабэ щыIа бжыгъэхэм нэхърэ. 

ХЬЭЩЫКЪУЕЙ Олег.