Тюнене Къабарты-Малкъар Республикагъа иш бла Россей Федерацияны Президентини Шимал-Кавказ федерал округда толу эркинликли келечиси Юрий Чайка келгенди. КъМР-ни Башчысы Казбек Коковну Юрий Яковлевич бла тюбешиуюню чеклеринде Президентибиз Владимир Владимирович Путин Федерал Жыйылыугъа Посланиясында белгилеген буйрукъланы Къабарты-Малкъарда бардырылыу сорууларын тынгылы сюзгендиле.
Алып айтханда, сёз саулукъ сакълау махкемелени жангыртыуну, мектеплени тынгылы ремонтларын андан ары бардырыуну эмда школгъа дери билим берген учрежденияланы тынгылы ремонтлары бла байламлы программагъа республиканы къатышыууну юслеринден баргъанды.
Дагъыда республиканы оноучусу Юрий Яковлевичге регионну инфраструктура айныууну юсюнден хапарлагъанды, ол санда Шимал-Кавказ федерал округну регионларыны араларында турист къолайлыкъны бла сатыу-алыу-экономика байламлыкъланы кенгертиуню да.
Энчи эс социал соруулагъа бёлюннгенди, республиканы адамларыны файдалыкъларын ёсдюрюуге бла жангы ишчи жерлени къураугъа да ол санда. 

КъМР-ни Башчысыны бла 
Правительствосуну пресс-службасы.