Кёп болмай нальчикчиле Битеуроссей халкъ фронтну (ОНФ) Къабарты-Малкъарда бёлюмюне Шогенцуков атлы орамда дарман суу эм балчыкъ бла багъыу мекям иги да тозурап, жараусуз болгъаны ючюн ётген-сётген кирмезча мадар этерге кереклисин билдиргендиле.
ОНФ-ни жаш тёлю бёлюмюню келечилери болум бла шагъырейленнгенлеринден сора, аны юсюнден шахарны администрациясына билдиргендиле. Аны бла бирге объектни тийресин зыбыр къалгъан-къулгъанладан тазаларгъа кереклиси да эсгертилгенди.
- Бу жол тинтиуле «Къоркъуусуз сабийлик» деген битеуроссей акциягъа кёре бардырылгъандыла. Сагъынылгъан мекям адамланы саулукъларына эм жашауларына окъуна уллу къоркъуу салыргъа боллугъуна шагъат болгъанбыз. Аны сау терезеси къалмагъанды, миялалары, ууалып, жерде атыладыла. Гитче, уллу да аберилерин кесерчадыла. Андан сора да, жаш адамла, маргиналла да мында терк-терк жыйыладыла. Аллай бир кезиуде биреу ачымай къаллыгъына неда оюлуп, уллу хата салмазына ышаныулукъ жокъду, - дейди ОНФ-ни жаш тёлю бёлюмюню таматасы Ярослав Галинский.
Эсге сала айтсакъ: Нальчикни администрациясында тарыгъыугъа терк окъуна эс бургъандыла. Ол санда мекямны тёгереги бла бийик хуна тартылгъанды. Аны тийресин кир-кипчикден тазаларгъа уа солуу паркга буюрулгъанды.
