Кёп болмай терк болушлукъ берген Склифосовский атлы араны нейрохирургия  службасыны таматасы,  Пирогов атлы  миллет медицина илму университетни    нейрохирургия  кафедрасыны профессору, Москва шахарны  штатда болмагъан баш нейрохирургу   Андрей Гринь Къабарты-Малкъарда болгъанды. Сынамлы  хирург Республикалы клиника больницада аберилерин  ачытханлагъа эм  аркъа  сюеклери ауругъанлагъа операцияла этиу жаны бла мастер-класс бардыргъанды. Ол санда коллегалары бла бирге сырт сюеклери, боюнлары эм беллери ауругъан ючеуленнге  операция этгенди.  Андан сора да,  эндоскопия технологияланы хайырланыуну эм аркъалары ауругъанлагъа багъыуну юсюнден  лекция окъугъанды.  
Андрей Гринь  КъМР-ни саулукъ сакълау министри  Рустам Калибатов бла да тюбешгенди. Аны кезиуюнде къонакъ  республикада нейрохирургия  службаны ишине бийик багъа бичгенди. Хирургланы эм орта медицина ишчилени да  усталыкъларын  белгилегенди. РКБ-да тынгылы болушлукъ тапдырыргъа битеу онгла болгъанларын  чертгенди.