Жаш тёлюбюзню кёбюсю бюгюнлюкде ара шахарда  жетишимлеге жетеди. Интернетни хайыры бла Москвада, башха уллу шахарлада  бардырылгъан концертледе  ёню бла кёплени сейирсиндирген, кесин  сюйдюрген жырчы, актриса Алла Бойченкону да кёпле таныйдыла.

 Ол къауум заманны сахнагъа  Камиля  деген ат бла чыгъып тургъанды. Эстрада вокалдан сора да, джазны да аламат айтады. Аны репертуарында къарачай-малкъар тилде бизни адетлерибизге, культурабызгъа жораланнган жырлары да асламдыла. Аланы санында «Мариям», «Атлы барады», «Карачай и Балкария», тюрк тилде «Emanet» эм башхала.

 Алгъаракълада ол республикагъа келип, Бызынгыда «Мариям» деген жырына видеоклип жаздыргъанды. Бюгюн  ол  бизни ушакъ нёгерибизди.

- Алла, окъуучуларыбызгъа кесинги юсюнгден айтсанг эди?

- Бюгюнлюкде юйюрюбюз бла Москвада жашайбыз. Алай эгечим, мен да мында туугъанбыз. Анам таулуду- Хурталаны Мариям, атам - Бойченко Сергей.  Экиси да музыка бла кюрешген адамладыла. Ташкентни театр институтун бошагъандыла. Танышхан да анда этген эдиле. Андан сора атам ГИТИС-ни да тауусхан эди. Экиси да бирге операда кёп жылланы жырлап тургъандыла.

Атам биз да ол ызы бла барсакъ сюйгенди. Алай сабий заманыбызда экибизни да жырлатып кёрюп,  ариу ёнлеригиз жокъду деп къойгъан эди. Андан сора мен да школ заманымда кесими жыр усталыкъда сынап кёрмегенме. Эгечим Юлия уа музыка жаны бла кюрешген да этмегенди. Бюгюнлюкде халкъла аралы байламлыкъ илмуланы кандидатыды, политология, дипломатия бла кюрешеди.

  Мен а актриса болургъа итинип, ГИТИС-ге хазырланнганымда, жырлай билгеними да ангылайма. Алай бла биринчи кереден окъуна жетишимли экзаменле берип, театрны  бла эстраданы артисти  бёлюмге  киреме.

Жырчыланы сабийлери аллай жашаугъа гитчеликден юйренип, сахнада кеслерин юйлериндеча сунадыла,  дейдиле. Алай абадан болгъунчу  аллай жумуш бла хазна кюрешмегениме, биринчи заманда сахнагъа чыгъаргъа къоркъа эдим. Алай атам кёллендирип тургъанына ол абызырагъаным кетген эди.

- Сен талай заманны сахнагъа Камиля деген ат бла чыгъып тургъанса. Не бла байламлыды ол?

- Манга Камиля деп нёгерлерим онюч  жылымдан бери айтадыла. Ол а кёбюсюнде ара шахарда ачылгъан къарачай-малкъар жаш тёлюню айныууна себеплик этген «Эльбрусоид» фонд бла байламлыды. Аллай биригиу болгъанын эшитгенимде, миллетибизни жаш тёлюсюн игирек таныргъа сюйюп, форумунда Камиля деген ат бла белгиленип башлайма. Талай замандан а,  ара шахарда фондну келечилери бла иги танышып,  тепсерге жюрюп башлагъан эдим.  Жыр искусствода да биринчи атламларымы аны хайыры бла этгенме. Эльбрусоидни хайыры  бла кёп тюрлю байрамлагъа да къатышып тургъанма. Алай байрамла, жыл сайын бардырылгъан землячество  болса да, кесими атым бла чыкъсам, кёпле  таулула бла не байламлыгъым барды деп сора эдиле. Аны ючюн Камиля деген атны жюрютюрге тюз кёрген эдим. Бюгюнлюкде уа кесими атым бла чыгъып, бу сфереда усталыгъымы не жаны бла айнытып ишлерге сюеме.

Жыйырма бир жылымда  фондха ишлерге чакъыргъан эдиле. Аллай онг бергенлерине  уллу ыразылыгъымы айтыргъа сюеме. Талай заманны анда ишлеп, къарачай-малкъарны адетлери, культурасы, адамлары  бла да игирек танышхан эдим. Аны себепли Эльбрусоид манга къачан да бир уллу, жарыкъ юйюрюмчады. Не заманда да барып, къарындашларымы, эгечлерими кёрюрге онгум болады.   

- Белгилисича,  атанг оруслу, ананг а таулуду. Ол эки миллетни адетлери, культуралары башхаракъдыла. Санга къайсысы жууугъуракъды аладан? 

 - Жашагъан  Москвада этип, оруслгъа  саналгъанлыкъгъа да,  анамы жанына бек тартылама. Кесими таулугъа санайма. Анча заманны ара шахарда жашагъанлыкъгъа, жюрегим бери тартханлай турады. Жууукъларым мында аслам болгъаны себепли уа терк-терк келгенлей турама.

 Аллай сюймеклик  адамны жюрегинде  айныйды. Не заманда да таулу тиширыуну сыфаты, къылыгъы  манга эм ариу юлгю болгъанды. Тиширыуну уяла билгени, кесин тау адетлеге кере жюрютгенин да  тюз сунама. Ара шахарда болгъанлыкъгъа да ол чекледен чыкъмайма. Адам  къайда болса да ариу адетине, тёресине къатды болургъа керекди.

- Сен Москвада сабий чыгъармачылыкъ студияны художестволу башчысы да болуп ишлейсе. Аны юсюнден да хапарласанг эди?

 - Кертисин айтханда, ол ишге эм алгъа кесими артист  усталыгъым айнымай къалса, мындан ары жашаууму не бла байларгъа боллукъду деген  оюм бла баргъанма.  Алай  кесим сабийлени юйретген студия  ачханда уа,  ол бек керекли зат болгъанын ангылагъанма. Нек дегенде, бу жаны бла усталыкъ гитчелеге, абаданлагъа да керекди. Артистизмге юйренсе адам,  тюрлю - тюрлю жыйылыулада эркин сёлешеди, абызырамайды. Бюгюнлюкде  биринчи класслагъа, таматалагъа да дерсле бергенлей турама.  Окъуучуларынг  юйретгенинги алып, аны бла хайырлана билгенлерин кёрсем а, андан да бек кёлленеме.

 - Сени къараучуларынг кёпдюле. Бир-бирле не къадар кюрешселе да,  хазна  тынгылаучуланы жыямайдыла,  бирле уа саулай стадионла жыядыла. Ол не бла байламлы болур?

 - Аны ангыларгъа, билирге да тынч тюйюлдю. Нек дегенле бир -бирлени ауазлары ёмюрге бир кере тюбейди.  Алай аны къараучу жаратамыды  огъесе угъай ангыларгъа бек къыйынды. Сени ауазынг бир энчи болгъанын бир бирле ангыламай да къоядыла. Алай  жырлары, макъамы ариу болуп, жюрегинден айта билсе уа, тынгылаучулагъа  кесин  сюйдюрюп къояды.  

- Сен миллет  бла европпалы макъамланы бир бири бла келишдирип, халкъ жырлагъа салып чыгъараса. Алай къураргъа къалай оюм этгенсе?

- Алгъаракълада «Мариям» деген ат бла альбом чыгъаргъанма. Анга уа  алты композиция киргенди. Аладан ючюсю-орус тилде, ючюсю уа макъамлары тюрлендирилген  къарачай-малкъар халкъ жырладыла.

   Сабий заманымдан  бери  афро-американлы макъамлагъа тынгылап ёсгенме. Аны себепли аллай музыкагъа бюгюнлюкде да бек тартылама. Жырларымда да ол энчилик эсленмей къалмайды. 

 Ол макъамланы уа биргеме окъугъан Москва театрны солисткасы Александра Акманова жазады.  Къарачай-малкъар тилни билмегенликге макъамланы уа аламат келишдиреди.  Манга тауча иги билирге болушхан, жангы жырла да жазгъан а  фахмулу жаш поэтибиз Жаппуланы Юсюпдю.  Ала бла хаус, соло, диско, джаз стильлеге кере жарашдыргъан тауча  композицияларыбыз да бардыла. Андан сора да ингилиз, тюрк, эбизе тилледе да  жырларым кёпдюле.

- Тюрлю-тюрлю фестивальлагъа, конкурслагъа уа къатышамыса?

- Мен тюрлю- тюрлю проектлеге къошулургъа, жангы затлагъа юйренирге сюйгенликге, конкурсланы артыкъ жаратмайма. Нек дегенде хар адам да, фахмусу да  кесича энчидиле. Аланы тенглешдирип, мунукъу игирек, аныкъы аманыракъ дегенни да ангыламайма, тюзге да санамайма.            Алай  адам не заманда да тутхан ишинде усталыгъын ёсдюрюрге итиннгенлей турургъа керек сунама. Аны ючюн конкурслагъа чакъырсала,   хазна бармаучума. Бир жетишимге жетип махтау излеп, кеслерин башхаладан бийик кёргенлени да ангыламайма. 

- Мындан ары уа къаллай умутларынг бардыла?

- Бюгюнлюкде сабийлени театр искусствогъа юйретгеним себепли, Нальчикде  да аллай бир къауум  дерсле бардырып, сабийлени ол усталыкъгъа итиниулюклерине къараргъа сюеме. Талай замандан а,  онгум болуп, мында да студия ачып юйретирге умутлума. Андан сора да, биринчи сольный концертими  мында этерме деп ышаныудама.

Ушакъны Темуккуланы Аминат бардыргъанды.