Нальчикде  Аллергия арагъа отуз жыл болгъанды. Анга жораланып «Иммунитетлери къарыусуз саусузланы багъыуну жангы амаллары деген 4-чю илму-практика  конференция ётгенди. Анга Шимал-Кавказ федерал округну  аллергологлары бла иммунологлары къатышхандыла. 

Эсге сала айтсакъ, СКФО-да аллергиядан къыйналгъанланы эм  иммунитетлери къарыусузланы  жаланда   бизни республикада    Аллергология бла иммунология арада багъылыргъа онглары барды.  Мында солуулары тыйылгъанлагъа эм этлери кичитип къоймагъанлагъа да   болушлукъ тапдырылады.

Буруннгу жылдан бери арада   атопия дерматитден бла псориаздан къыйналгъанлагъа  бийик технологиялы  медицина болушлукъ бериледи. Энчи халда жарашдырылгъан дарманла кёп аурууладан болушадыла. 

Учрежденияны Элбрус тийресинде реабилитация бёлюмю да ишлейди. Мында бир жолгъа отуз адамгъа багъар онгла бардыла.  Бёлюм «КъМР-да  къысха заманда саулукъну кючлерча амалла программаны  чеклеринде  жангы оборудование   бла да жалчытылыннганды.
Былтыр  арада 20 минг адамгъа   амбулатор болушлукъ тапдырылгъанды. Ол тизмеде  къыралны бирси регионларындан  иги кесек адам барды. 

Кёп жылланы мында Къабарты-Малкъар къырал университетни медицина бёлюмюню студентлери юйренедиле.  Ол себепден  арада хайырланылгъан шёндюгю оборудование бла  технологияла     республиканы медицина бёлюмюн айнытыугъа энчи къошумчулукъ этедиле. Бусагъатда мында    300 аллергокомпонент аурууну сылтауун тюз тохташдырыргъа болушады. Былтыр  астмадан къыйналгъанлагъа эм этлери чапыргъанлагъа  да  багъарча саулай  СКФО-да кесине кёре биринчи прибор алыннганды.   Мындан арысында бу багъыу махкеме айныуну жолудан таймай барыргъа, саусузларына багъыуну бютюн къыйматлы этерге таукелди. 

Курданланы Сулейман хазырлагъанды.