Федерал налог службаны «юНГа» деген Битеуроссей жарыкъландырыу проектини чеклеринде, бу ведомствону Къабарты-Малкъарда Управлениясыны специалистлери Нальчикде 6 номерли орта школну 5-6 классларында налог окъуулулукъну юсюнден дерсле бардыргъандыла, деп билдиргендиле ФНС-ни пресс-службасындан.

Управленияны къырал жумушла бериу бёлюмюню келечилери Баева Марьяна бла Битохова Диана сабийлеге къаллай налогла болуучусун, аланы нек ючюн эмда къалай тёлерге кереклисин, ол ахча ызы бла къайры баргъанын эмда къыралны экономикасына бла бюджетине нечик уллу магъанасы болгъанын билдиргендиле. Дагъыда адам налог тёлеучюлени санына ненча жылы толгъандан сора киргенини, аллай тёлеулени къалай тергегенлерини, льготаланы юсюнден да айтхандыла.

Ызы бла окъуучулагъа «Рассказ о Фоме и налогах» деген къысха суратлау фильм, андан сора уа юйретиу роликле эмда ангылатыу материалла кёргюзтгендиле. Дерсни ахырында викторина бардыргъандыла. Ары дери айтылгъаннга сабийле уллу эс буруп тынгылагъанларын женгил кёргюзтгендиле, къонакълагъа кёп соруу да бергендиле.

Улбашланы Мурат.