Россейни Президентини оноуу бла быйыл Юйюрню жылыды. Аны бла байламлы республиканы Жамауат палатасында коммерциялы болмагъан организацияла (НКО) юйюр политиканы бардырыугъа къаллай болушлукъ эталлыкълары сюзюлгенди. Жыйылыугъа власть, асламлы информация органланы келечилери къатышхандыла. 

Жыйылгъанла белгилегенлерича, Юйретиучюню бла насийхатчыны жылындан сора Юйюрню жылы башланнганы энчи магъананы тутады, нек дегенде хар инсанны жашау жолу юйде башланады.  Аланы чеклеринде сабийлени, ёсе келген тёлюлени юйретиуге жораланнган миллет проектле жарашдырыладыла.  

Къабарты-Малкъарны урунуу эм социал къорууланыу министри Асанланы Алим билдиргеннге кёре, республиканы власть эм жер-жерли самоуправление органлары юйюрлеге ахча эм башха себеплик этерча право мардаланы къабыл кёргендиле. «Аны хайырындан жамауат биригиуле тёрели юйюр хазнаны сакълауда жетишимли ишлерча право, инфраструктура, кадрла эм методика жаны бла мурдор къуралады. Инсан тин-ниет жаны бла айнырына, тёрелени араларында байламлыкъла сакъланырына, сабийлени Ата журтларына, миллетлерине, маданиятларына сюймекликде ёсдюрюуге къайгъырылады», - дегенди ол.   

Миллетлени ишлери эм жамауат проектле жаны бла министерствону жамауат проектле бёлюмюню башчысы Эльберт Коцев айтханнга кёре, «Юйюрге, аналыкъгъа эм сабийликге болушлукъ этиу», «Сабий эм жаш тёлю къымылдауланы айнытыу» жаны бла проектлени тамамлаугъа ахча дайым бёлюнеди, жаш тёлю биригиулеге ишлерин бардырыргъа себеплик да уллуду.  

- Юйюрню жылына аталгъан ишлени чегинде ведомство «Куначество» жаш тёлю проектни бла Комерциялы болмагъан организацияланы граждан форумун бардырыр муратлыды. Биринчисине, тёреде бола келгенича, республиканы шахарларындан бла районларындан онсегиз юйюр къатышырыкъдыла, аладан тогъузу юйюрлерине башха миллетледен жашланы къонакъ этерикдиле. Бу проектни магъанасы тин-ниет, юйюр эм маданият хазнаны къурауду эм сакълауду, - деп чертгенди ол. 

Юйюр байлыкъланы сакълауда сынамларыны юсюнден районлада тиширыуланы союзларыны башчылары айтхандыла. Билдирилгенича, жамауат биригиулени келечилерини къатышыулары бла шахар эм район администрациялада жамауат палатала ачылгъандыла, сабийлени миллетлени араларында шёухлукъну кючлеу, юйюр хазнаны багъалауну эм Ата журтха сюймекликни ниетлеринде юйретирча комиссияла да къуралгъандыла. Палатаны келечиси Хаути Сохроков белгилегенича, бизни республикада юйюрге не заманда уллу магъана берилгенди. «Юйюр - ол инсанны ич дуниясы къуралгъан жерди. Миллетини тин хазнасына, аны тарыхына бла маданиятына, адёт-тёрелерине кёз къарам анда тохташады», - дегенди. «Биринчилени атламлары» битеуроссей къымылдауну регионда бёлюмюню советини башчысыны проект иш жаны бла орунбасары Забакъланы Азамат ала жаш тёлю бла къалай ишлегенлерини, ол санда «Тутхучлу юйюр» жаны бла къаллай борчла тамамлагъанларыны юсюнден доклад этгенди.     

Палатаны граждан обществону институтларын айнытыу, миллетле эм динле аралы халланы игилендириу, коммерциялы болмагъан секторну айнытыу жаны бла комиссиясыны башчысы Николай Маслов а Юйюрню жылыны чегинде къайсы жаны бла ишлерге кереклисин билдиргенди. Ол санда юйюрлеге къаллай болушлукъ этилгенини, адамланы юйюр къураргъа кёллендирирге эм сабийле тууарына къаллай ахшы башламчылыкъла этилгенлерини юсюнден дайым билдирирге, бюгюнлюкде чыкъгъан жарсыуланы тамамлау бла кюрешиу, хар юйюр къыралны тамблагъы кюнюне къаллай къошумчулукъ этгенин кёргюзтюрге, къыралны юйюр эм демография политикасын бардырыугъа къатышыу да.     

Жыйылыуну эсеплерине кёре, сейирлери болгъан ведомстволагъа бла жамауат биригиулеге эсгертиуле жарашдырылгъандыла.

 

Кульчаланы Зульфия.