Нальчикде Идаров атлы орамны аэропорт таба баргъан кесегине быйылны ахырына дери ремонт этерикдиле. Жоллагъа къарагъан «Кавказ» Управленияда айтханларына кёре, аны узунлугъу беш километрди, ол кеси да тёрт ызлыды.
Улоуланы саны жылдан-жылгъа кёбейе барады, бюгюнлюкде ол жол бла бир кюнню ичинде 30 мингден артыкъ машина ётеди. Аны ючюн сейир тюйюлдю асфальт терк тозурап баргъаны да, дейдиле Управленияны специалистлери. Орамда жарылгъан жерле, чунгурла да кёрюнедиле, ремонт этилгенден сора уа, жол иги да сыйдам боллукъду, деп ышандырадыла.
Ишни эски асфальтны къырып, алай башларыкъдыла. Энчи машина, аны ууакъ тартып, ичине чайыр бла цемент къошуп, ызына жаярыкъды. Артда аны юсюне эки къатлы асфальт саллыкъдыла. Эм башындагъы зыгъыр-мастика тюрлюсюнден боллукъду. Ол тозурамай иги кесек заманны сакъланады, улоуланы чархлары да аны юсюнде иги учхаламайдыла. Башха орамлагъа къошулгъан жерледе да мадар этилликди. Бу объектде дагъыда бордюр ташланы алышырыкъдыла, ызланы уа термопластикден жарашдырлыкъдыла.
Ишлени жолну узунуна эки тенг бёлюп, аллындан биринчи, ызы бла уа экинчи кесегинде бардырлыкъдыла. Машиналаны жюрюулери да анга кёре боллукъду. Бир амал бар эсе, водительле башха орамла бла барсала иги боллукъ эди, деп тилегендиле Управленияны келечилери.
Улбашланы Мурат хазырлагъанды.