КъМР-ни Башчысы Казбек Коков, баш кюн Урван районда болгъанда, Нарткъалада Къабарты-Малкъар Республиканы Терроризмге къажау комиссиясыны жыйылыуун бардыргъанды.  
Кенгешге КъМР-ни Парламентини Председатели Татьяна Егорова, КъМР-ни Правительствосуну Председатели Мусукланы Алий, РФ-ни Президентини СКФО-да толу эркинликли келечисини аппаратыны КъМР-де федерал инспектору Дмитрий Васильченко, муниципалитетлени администрацияларыны башчылары, регионну право низамны сакълаучу органларыны таматалары къатышхандыла.
Бек алгъа республиканы Башчысы комиссияны къауумун КъМР-де ич ишлени министрини къуллугъун болжаллы халда толтургъан, полицияны генерал-майору Вячеслав Крючков бла танышдыргъанды. «Вячеслав Геннадьевични уллу сынауу барды, ол Къабарты-Малкъар Республикагъа жарарыгъына эмда Президент, Россейни ич ишлени министри да салгъан борчланы толтурургъа себеплик этеригине ишексизме», – дегенди ол. 
Андан сора  Казбек Коков Росгвардияны КъМР-де Управлениясыны таматасы Сергей Васильевни энчи генерал-майор чын берилгени бла алгъышлагъанды. 
Жыйылыуда Россей Федерацияны Президентин айырыуланы кезиуюнде, алагъа хазырлана туруп да къоркъуусузлукъну жалчытыугъа энчи эс бурулгъанды. Право низамны сакълаучула, кюч структурала да анга къалай хазырланнганларыны юсюнден тынгылы айтылгъанды. КъМР-ни Терроризмге къажау комиссиясыны ишини юсюнден а КъМР-ни Айырыу комиссиясыны таматасы Вячеслав Гешев бла Вячеслав Крючков билдиргендиле. 
Кенгешде дагъыда транспортда, аны бла байламлы жумушланы тындыргъан объектледе террорчулукъдан сакъланыуну мадарларын къатыландырыргъа кереклиси эсгертилгенди. Муниципалитетледе терроризм эмда экстремизм бла байламлы ниетле жайылмазча этиуге энчи эс бурулгъанды, деп билдиргендиле КъМР-ни Башчысыны бла Правительствосуну пресс-службасындан.