Нальчикде Ленин атлы орамны баш жанында орта школну къурулушу башланнганын  алгъын да  билдирген эдик. Проекти бла белгилегенича ол тёрт къатлы боллукъду.
Объектде ишле  бу кюнледе  къыстау барадыла. КъМР-ни Къурулуш эмда жол мюлк министерствосундан билдиргенлерине кёре, подряд организацияны специалистлери шёндю аны биринчи эм экинчи этажларыны къабыргъаларын сюей турадыла. Аны бла бирге  бетон ишлени тамамлайдыла, темир конструкцияланы орнатадыла.
Школну ток бла жалчытырыкъ трансформатор подстанцияны мекямы да хазырды. Шёндю аны ичинде сюртюу-бояу ишле барадыла. Котельня да тамам этилгенди, кесинде да бирикген кючю 3600 киловатт болгъан эки котёл орнатылгъанды. Специалистле шёндю  ток ызланы  тарта турадыла.