Тёреде болуучусуча, быйыл да 22 июльда Нальчикде КъМР-ни халкъ поэти, Социалист Урунууну Жигити Алим Пшемахович Кешоковну туугъан кюнюн белгилей, аны тамамлагъан ишлерине, акъ сёз бла, къара сёз бла да жазгъан чыгъармаларына, саулай да жашау жолуна сыйлы багъа биче, ол иги адамны атын ариу бла эсгерирге сюйюп, поэтни, жазыучуну атын жюрютген орамда эсгертмесини  аллында аны къалам къарындашлары, республиканы интеллигенциясы, адабиятны сюйгенле жыйылгъандыла.

 

Жыйылыуну КъМР-ни культура  министри Мухадин Кумахов  ачханды.  Алим Пшемаховични бийик  фахмусуну, адамлыгъыны, аны адабиятда, къыралыбызны жамауат жашауунда, аны таныгъанланы жюреклеринде да къойгъан ызыны юсюнден айтып, ол: «Алим Кешоков бети бла жарашыулыкъда жашагъанды. Ол кёплеге болушханды. Тамата дуниясын алышхандан сора бек кёпле аны алагъа билеклик этгенин айтадыла, эсгередиле.  Ызындан алай айтдырырча насып кёплеге тюшмейди», – дегенди.

 

Ызы бла ол сёзню КъМР-де Адамны эркинликлери жаны бла  уполномоченный Зумакъулланы Борисге бергенди. Ол: «Жыл сайын биз уллу поэтге, жазыучугъа жюрек ыразылыгъыбызны билдирир ючюн, бери келебиз. Аны жюзжыллыгъында мен: «Ол кертини кесича ачыкъ эди эм Минги тауча бийик эди», –  деп жазгъанма. Айхай да, алайды, ол аламат адамлай, бек уллу жазыучу бийиклеге жетип, жамауат адамыча  къалгъанды эсибизде», – дегенди эм   Кешоковну чыгъармаларыны аны къуралыуунда уллу магъаналары болгъанын, аны заманлашы, бир жерлиси болгъаны бла ёхтемленнгенин  белгилеп, поэтни  кеси жаратхан назмусун айтханды.

 

Китап чыгъарыучу,  басманы таматасы Виктор Котляров: «Тукъумларын сагъынмай,  жаланда атларын айтып къойсакъ да, жамауатда белгили болуп къалгъанла бардыла. Къайсын десек, Алим десек, ала ким болгъанларын терк ангылайбыз: бири – Къулий улу, экинчиси – Кешоков.
Биз бюгюн аны орамында, аны эсгертмесини къатында сюелебиз. Жазгъан адамны юсюнден айтханда, бек биринчиден, сёз аны чыгъармачылыгъы бла байламлыды. Жаш тёлю асламында Кешоковну назмуларын биледи. Мен а аны «Сломанная подкова» деген романын (къайтып ненчанчы кере!) окъуй турама. Анда ол айтхан затла бизни тарыхыбызны кёрюмдюсюдюле.