КъМР-ни Башчысы Казбек Коков СКФО-да жашырын ишлегенлени санын азайтыу эмда урунуу халланы ачыкъ этиу жаны бла ведомствола аралы комиссияны  видеоселектор жыйылыууна къатышханды. Аны РФ-ни Президентини Шимал-Кавказ федерал округда толу эркинликли келечиси Юрий Чайка бардыргъанды. Анда 2021 жылны эмда быйылны биринчи кварталыны баш социал-экономика кёрюмдюлерине къаралгъанды.
Кенгешге дагъыда РФ-ни урунуу эмда социал къоруулау министри Елена Мухтиярова, РФ-ни Баш прокуроруну орунбасары Андрей Кикоть, Россейни МВД-сыны Шимал-Кавказ федерал округда Баш управлениясыны оноучусу Сергей Бачурин, СКФО-ну субъектлерини башчылары, тийишли федерал структураланы жер-жерледе бёлюмлерини эмда жамауат биригиулени келечилери къатышхандыла.
Белгиленнгенича, былтыр СКФО-да промышленность производствону бла эл мюлк продукцияны ёлчемлери ёсгендиле, жашау журтланы къурулушу терк атламла бла баргъанды, школлада бла сабий садлада жерлеге да иги кесек къошулгъанды. Быйыл да ол тирилик сакъланады, розница сатыу-алыуну ёлчемине да къошулгъанды. Ол а, кенгешде айтылгъаныча, пандемия салгъан тыйгъычла кетерилгенлерине шагъатлыкъ этеди. Дагъыда файдалы предприятияланы саны, Шимал-Кавказ федерал округга этилген инвестицияланы ёлчеми да ёсгендиле. Инвестицияланы саулай ёлчеми уа эки жылгъа эки кереге кёбейгенди.
Ушакъны кезиуюнде СКФО-ну субъектлеринде ишчи жерле къурау, ишлегенлени санын пандемиягъа дери кезиуню ёлчемине жетдириу жаны бла кёрюмдюлерине да къаралгъанды. Юрий Чайка мында урунуу халланы ачыкъ этиу баш борч болгъанлай къалгъанын чертгенди. Алгъаракълада жашырын ишлеуге къажау мадарланы регион планлары къабыл кёрюлгенлерин да эсгертгенди.
Кенгешде Урунуу эмда иш бла жалчытыу жаны бла федерал службаны  СКФО-ну жеринде ишлерин бардыргъан органларын РФ-ни Пенсия фондуну сервислерине къошууну амаллары да сюзюлгендиле. Битеу туура этилген соруулагъа кёре буйрукъланы тизмеси къуралгъанды.
«Къабарты-Малкъарда урунуу халланы ачыкъ этиу эмда жашырын ишлегенлени санын азайтыу жаны бла план къалай толтурулгъанын муниципал къуралыулада дайым тинтгенлей турабыз. Урунуу халла ачыкъ болсала, иш бериучюле ишчилери бла урунуу келишимле этедиле. Алай бла адамлагъа къырал социал болушлукъну хайырланыргъа, ол санда хакъ тёленнген отпускагъа чыгъаргъа, пенсиягъа ахча ётдюрюрге, ауругъан кезиулеринде да айлыкъдан къуру къалмазгъа онг бериледи. Иш бла жалчытыуну къырал эмда муниципал службалары ол ишни андан ары бардырлыкъдыла», – деп чертгенди Казбек Коков кесини телеграм-каналында, кенгешни эсеплерин чыгъара. 

КъМР-ни Башчысыны бла Правительствосуну 
пресс-службасы.