Бу айны 22-синден башлап, «Россия» авиакомпания Санкт-Петербургга рейсле ачады. Аны юсюнден КъМР-ни халкъла аралы аэропортуну пресс-службасындан билдиредиле.
Хауа кеме Пулководан Нальчикге кюн сайын эрттенликде 9:30 сагъатда чыгъарыкъды, ызына уа 13:40 сагъатда къайтырыкъды.
Май байрамлада пассажирлени санына танг кесек къошулгъаны ючюн, ол айны 1-чи, 2-чи, 8-чи, 9-чу, 10-чу, 11-чи кюнлеринде «Санкт-Петербург-Нальчик-Санкт-Петербург» маршрут бла къошакъ рейсле къураллыкъдыла. Анга кёре, Пулководан Нальчикге 1-чи, 8-чи эм 10-чу кюнледе эрттенликде 11:50 сагъатда, Нальчикден Пулковогъа уа 2-чи, 9-чу эм 11-чи майда ингирде 18:10 сагъатда учаргъа боллукъду.
Алгъаракълада бу айны 30-дан башлап, «Домодедовогъа» «S7 airlines» авиакомпанияны 164 адам олтургъан Airbus A320 NEO хауа кемеси кюн сайын рейс этериги билдирилгенди. Дагъыда ол кюнледе «Победа» авиакомпания да «Внуково-Нальчик-Внуково» маршрут бла кюн сайын учарча рейслени башлайды. Ол «Внуковода» 07:55 сагъатда, Нальчикден ызына уа 12:10 сагъатда атланырыкъды.
