Газ ызлагъа соргъан сурагъан этмей къошулгъанланы излеу жаны бла кезиулю рейд бардырылгъанды. «Газпром межрегионгаз Нальчик» бла «Газпром газораспределение Нальчик» компанияланы ишчилери бу жол Урван районда Кахун элге барып, теплицалары неда юйлери уллу болуп, алай газны уа аз къоратханча алай кёргюзтгенлени жокълагъандыла. Тинте кетгенлеринде магистраль газ ызлагъа юч юйден жашырын быргъыла къошулуп тургъанын кёргендиле.

Компанияланы адамлары бу шартланы юслери бла тийишли актла жазылгъандыла. Ол быргъыланы уа кесип, абонентлени ишлерин правону къоруулаучу органлагъа жибергендиле.

Газны урлау жаланда бу шартла бла чекленип къалмайды. Компаниялада айтханларыча, быйыл ала 257 абонентни жууапха тартхандыла. Тергегенде, аланы барындан да 8 миллиондан аслам сом багъасы хата келгенди. Бу абонентлеге 201 административ иш ачылгъанды, 107 тазир салыннганды. Энтта да тёртеуленнге уа Уголовный кодексни 215 статьясыны 3-чю кесегине тийишлиликде уголовный ишле ачылгъандыла.

Эсге сала айтсакъ, газ ызлагъа эркинлик берилмей къошулгъан гражданлагъа 10-15 минг сом тазир салынады. Аны этген къуллукъчула 30-80, предприятияла неда организацияла уа 100-200 мингишер сом тёлерикдиле. Аны юсюне уа газ юч айны ичинде тохтаусуз хайырланып тургъаныча тергеп, аны багъасын да борчха жазарыкъдыла. Къайтарып тутулгъан инсан а эм азындан 80 минг сом тёлеуге къаллыкъды.

«Быллай рейдлени дайым бардырабыз. Уручула бизге къоранч этиу бла къалмайдыла, тёгерекдегилеге да къоркъуу саладыла. Нек дегенде тешилген быргъыдан чыкъгъан газ чачылыргъа, къабынып от салыргъа да боллукъду», - дегенди «Газпром межрегионгаз Нальчик» компанияны башчысы Залим Вороков.

Улбашланы Мурат хазырлагъанды.