КъМР-ни Башчысы Казбек Коков Россей Федерацияны Регионланы айнытыу жаны бла правительстволу комиссиясыны штабыны жыйылыууна къатышханды. Кенгеш РФ-ни вице-премьери Марат Хуснуллинни башчылыгъы бла бардырылгъанды. Анда миллет эмда федерал проектле къалай толтурулгъанларына къаралгъанды.
Штабны жыйылыууна РФ-ни къурулуш эмда жашау журтла-коммунал мюлк министри Ирек Файзуллин, регионланы башчылары да къатышхандыла. Аны башлай, Марат Хуснуллин Правительство жер-жерледе къурулуш селеймезине дайым къайгъыргъанын, кюн сайын да тийишли мадарла жарашдыргъанын эсгертип, ала заманында сингдирилирге керек болгъанларын чертгенди. Арт эки ыйыкъда чыгъарылгъан оноула къурулушну терклендириуге, аны бла байламлы къагъытланы жарашдырыуну тынч этиуге бурулупдула, деп къошханды ол.
Алайды да, къурулуш бардырыргъа эркин этиуню быйылны 1 августунда тауусуллукъ болжалы дагъыда бир жылгъа созулады. Жер участкаланы барысында да къурулушланы планлары да ол оноугъа киредиле. Андан сора да, жер-жерлени планларыны проектлерине эркинлик алыуну болжаллары 15 кюнден 10 кюннге дери къысхартыллыкъды. Аллай проектлени хазырларгъа власть органдан эркинлик алыр кереклиси да жокъду энди. Правительство дагъыда жер участкала юлешиуню, алада къурулуш бардырыргъа эркин этиуню, эки эм андан да кёп къурулуш участкалада орналгъан объектлени хайырланыргъа бериуню жорукъларын да къабыл кёргенди.
Къабарты-Малкъарда жашау журтла, жолла ишлеу, инфраструктураны къурулушлары, шахарны тапландырыу селеймейди, бютюн кюч ала барады, дегенди республиканы Башчысы кенгешден сора кесини телеграм-каналында.
«Битеу ишле да белгиленнген заманларындан артха къалмай бардырыладыла: магъаналы объектлени, ол санда школланы бла больницаланы, къурулушларын андан ары бардырабыз. Нальчикде 1500 жери, Бахсанда да 1224 жери боллукъ эки уллу школ ишлеуню юсюнден келишим этилгенди. Аланы хар бирине миллиард сомдан артыкъ къоратыргъа белгиленеди. Эки мектепни да 2023 жылны декабрине хайырланыргъа берирге мурат этебиз.
Эсигизге салайым: «Билим бериу» миллет проектни «Шёндюгю заманны школу» деген федерал проектине кёре быйыл бир жолгъа 10 мектеп ишлене турады. Аны бла бирге Нальчикде жалгъан бузу бла башы жабылгъан катокну къурулушун да башлагъанбыз. Дагъыда Жангы Малкъарда бла Бахсанны 6-чы номерли школунда сабий садланы, Ташлы-Талада яслини да хайырланыргъа берирге хазырланабыз. Аялгъан ахчагъа дагъыда бир шахар тийрени – Тырныауузда Молодёжная орамда скверни - тапландырыргъа оноу этгенбиз», - деп айтылады Казбек Коковну билдириуюнде.
Эсигизге салайыкъ: 10 мектеп Нальчик, Бахсан, Прохладный (мында экиси окъуна), Майский, Нарткъала шахарлада бла Псынабо, Красносельское, Сармаково, Куба элледе ишленирикдиле. Дагъыда беш жылны ичинде Къабарты-Малкъарда 63 мектепге тынгылы ремонт этилликди. Республика федерал министерствогъа окъуу юйлени жангыртыу жаны бла регион программасын бергенди.
Нальчикде «Саулукъ сакълау» миллет проектге кёре республикалы онкология диспансерни къурулушу андан ары бардырыллыкъды. Шахарда 1-чи номерли поликлиниканы жангы мекямы да ишленип башланнганды. Аны 2023 жылны ахырына битдирирге белгиленеди. Жай бошалыргъа Тёбен Чегемде гитче футбол майдан хазыр боллукъду, Къабарты-Малкъарны 100-жыллыгъына уа 12 жамауат тийре, ол санда Нальчикде 7 жангы сквер, тапландырыллыкъдыла.
КъМР-ни Башчысыны бла Правительствосуну пресс-службасы.
