Иджыблагъэ Москва щекIуэкIащ мэкъумэш кооперативхэм я VI съездыр

ЗэIущIэшхуэм кърихьэлIащ Урысей Федерацэм и щIыналъэ 70-м къикIа делегату 500-м ­щIигъу. Ахэр тепсэлъыхьащ ди къэралым мэкъумэш коопера-         цэм зыщегъэужьынымкIэ дызыхуэкIуэ илъэс гъу­нэгъухэм къэув къалэн нэхъыщхьэхэм.

Къэбэрдей-Балъкъэрым икIа делегацэр хэтащ тэ­мэму лажьэ мэкъумэш кооператив зыбжанэм я унафэщIхэр, апхуэдэу МэкъумэшыщIэ (фермер) хо­зяйствэхэмрэ мэкъумэш кооперативхэмрэ я ассо­циацэм и къудамэу КъБР-м щыIэм щыщхэр.
Апхуэдэу ирагъэблэгъауэ съездым щыIащ КъБР-м и Правительствэм и УнафэщIым и япэ къуэдзэ- КъБР-м мэкъумэш хозяйствэмкIэ и министр Говоров Сергей, КъБР-м мэкъумэш хозяйствэмкIэ и министрым и къуэ­дзэ Уэдыхь Тимур, КъБР-м Мэкъумэш хозяйствэмкIэ и министерствэм финансхэмкIэ, экономикэмкIэ, агропромышленнэ комплексым къэралым и дэIэпыкъу­ныгъэ етынымкIэ и управленэм и унафэщI Кулаковэ Иринэ сымэ.
Урысей Федерацэм мэкъумэш хозяйствэмкIэ и ми­нистр Патрушев Дмитрий ищIа докладым къыщигъэлъэгъуащ къуажэхэм хьэрычэт IэнатIэ мыинымрэ курытымрэ зыщаужьын папщIэ зыхуэфащэ хэкIыпIэ псори къызэгъэпэщын зэрыхуейр, сыту жыпIэмэ абыхэм къалэнышхуэ ягъэзащIэ къуажэдэсхэм я псэукIэр егъэфIэкIуэн и лъэныкъуэкIэ.
- Дуней псом щекIуэкI лэжьэкIэм наIуэ къещI коо­ператив зэпыщIэныгъэхэр лэжьэкIэ нэхъ тэмэмхэм зэращыщыр, - къигъэлъэгъуащ федеральнэ минист­рым. - Апхуэдэ мылъку зехьэкIэр Iуэхум нэхъ хуэщIащ икIи мэкъумэш продукцэр щэнымкIэ, абы и уасэм кIэрыгъэхунымкIэ дэIэпыкъуэгъушхуэ хъуфынущ.
Докладым къызэрыхэщамкIэ, Урысейм Мэкъумэш хозяйствэмкIэ и министерствэм илъэс куэд щIауэ ­грантхэр яхухех мэкъумэш потребительскэ кооператив­хэм. А мурадым хуэгъэзауэ къуажэдэсхэм яIэрыхьэ ахъшэми хэхъуэ зэпытщ. Къапщтэмэ, 2017 гъэм елъы­тауэ дызэрыт илъэсым мэкъумэш кооперативхэм гранту хуэдэ 1,5-кIэ нэхъыбэ хухахащ. Ар ахъшэкIэ къапщтэмэ, сом меларди 2-рэ мелуан 400-рэ мэхъу.
Федеральнэ министерствэр гъэзэщIакIуэ властым и щIыналъэ органхэм ящIыгъуу зэпымыууэ кIэлъоплъ ­агробизнес мыинымрэ кооператив зэщIэхъееныгъэм-рэ Урысейм и щIыналъэхэм къызэрыщызэгъэпэщам.
- Апхуэдэ кIэлъыплъыныгъэхэм къарикIуэхэм тращIыхьынущ къэралым и дэIэпыкъуныгъэр зэрытрагуа­шэри, - жиIащ министрым. - ДэIэпыкъуныгъэр нэхъы­-бэу хухахынущ абы нэхъ хуэныкъуэхэм.
Урысейм Мэкъумэш хозяйствэмкIэ и министерствэм и мурадщ мэкъумэш кооперативхэм тэмэму зыщамыужьа щIыналъэхэм хэхауэ защIигъэкъуэну икIи фермер хозяйствэхэмрэ мэкъумэш кооперативхэмрэ къы­зэгъэпэщыным трагъэкIуэдэн ахъшэ яхухихыну.
Съездым зэрыщыжаIамкIэ, дызэрыт илъэсым къриубыдэу къащтэну я мурадщ «Фермерхэм ядэIэпы­къунымрэ мэкъумэш кооперативхэм зегъэужьынымкIэ системэ зэтегъэувэныр» 2024 гъэм нэс тещIыхьа фе­деральнэ проектыр. Псори зэхэту ар гъэзэщIэным сом мелард 37-рэ мелуан 400-рэ текIуэдэнущ.
Урысейм мэкъумэш хозяйствэмкIэ и министрым и ­къуэдзэ Лут Оксанэ зэрыжиIамкIэ, проектыщIэм унэ­тIыныгъэ нэхъыщхьэу щы иIэщ. Абыхэм ящыщщ ­мэкъумэшыщIэ (фермер) хозяйствэхэр къызэгъэпэ­щынымрэ абыхэм зегъэужьынымкIэ грантхэр, мэкъу­мэш потребительскэ кооперативхэр къызэгъэпэ­щы­нымрэ абыхэм зегъэужьынымкIэ субсидиехэр, апхуэдэу методологие, информацэ дэIэпыкъуныгъэмкIэ центрхэм зегъэужьыныр. А псори сэбэп хъун хуейщ фермерхэмрэ потребительскэ кооперацэм хиубыдэу уней ­лъапсэхэр зезыхьэхэмрэ я бжыгъэр нэхъыбэ щIынымкIэ.
А псоми къадэкIуэу иджыпсту лэжьыгъэшхуэ зэфIагъэкI мэкъумэш потребительскэ кооперативхэм я финанс, хозяйствэ Iуэхухэр зэрызэблагъэкI хабзэ мардэхэр егъэфIэкIуэным хуэунэтIауэ.
Урысейм Мэкъумэш хозяйствэмкIэ и министерствэм иригъэжьащ къуажэ щIыналъэхэм зегъэужьыным теухуа къэрал программэщIэ убзыхуныр икIи кооператив зэщIэхъееныгъэм хиубыдэ псори къыхуреджэ а проектыр гъэхьэзырыным я къарур ирахьэлIэну.
Мыхьэнэшхуэ зиIэ зи чэзу Iуэхухэр съездым къыщиIэтащ Урысейм и МэкъумэшыщIэ (фермер) хозяйствэхэмрэ мэкъумэш кооперативхэмрэ я ассоциацэм и президент Плотников Владимир. Абыхэм ящыщщ ­бизнесым и IэнатIэ мыину мэкъумэш хозяйствэм щы­лажьэхэм кърахьэлIэ продукцэр федеральнэ IэнатIэм щыщэныр къызэгъэпэщыныр.