Повестканы магъаналы сорууу - инсанланы учуз эм качестволу жашау журтла бла жалчытыу

КъМР-ни Правительствосуну кезиулю жыйылыуунда республиканы къырал финансларын игилендириу жаны бла программа къабыл кёрюлгенди, Къабарты-Малкъарны бла Беларусь Республиканы правительстволарыны араларында бирге ишлеуню юсюнден келишимни проектине къаралгъанды. Кенгешни премьер-министр Мусукланы Алий бардыргъанды.
Биринчиден, 2018-2020 жыллада КъМР-ни къырал финансларын игилендириу жаны бла программа сюзюлгенди. Финансла министрни къуллугъун толтургъан Елена Лисунну айтханына кёре, ол республиканы социально-экономикасын айнытыу жаны бла келишимни чеклеринде жарашдырылгъанды.
«Документге тийишлиликде, республиканы бюджетини къоранчларын бла файдаларын келишдирирге федерал арадан дотацияла бёлюннгендиле. Дагъыда КъМР-ге бюджет кредит бериуню юсюнден къошакъ келишим да этилгенди. Аны ючюн а субъектни толтуруучу власть органлары  быйыл 1 октябрьге дери бюджетни файдаларын ёсдюрюуню эмда къоранчланы азайтыуну планын къабыл кёрюрге керекдиле»,-дегенди ол.
Къабарты-Малкъарны  бла Беларусь Республикаланы правительстволарыны араларында социал-культура, илму-техника эм сатыу-алыу экономика жаны бла бирге ишлеуню юсюнден келишимге къол салыргъа белгиленеди. Экономиканы айнытыу министр Рахайланы Борис билдиргенича, битеу тийишли документле хазыр этилгендиле. «Келишимге быйыл 10-12 октябрьде Могилев шахарда къол салыргъа белгиленеди»,-дегенди ол.
Халкъны пассажир транспорт бла жюрютюуню къурауну юсюнден, ол санда шахарда ток бла жюрюген, темир жол транспорт бла да, республикалы законнга тюзетиулеге да къаралгъанды. Правительствону башчысыны орунбасары инфраструктура эм цифра жаны бла айнытыу министр Владимир Болотоков ангылатханыча, пассажирлени жюрютюу бла кюрешген организацияла жорукълагъа дайым да бузукълукъла эте эселе, жууаплы структуралагъа, жер-жерли власть органлагъа аланы ишлерин тохтатыуну юсюнден дауну сюдге берирге эркин этилгенди. Документге башха тюзетиуле да кийирилгендиле.
«РФ-ни инсанларын учуз эм качестволу жашау журтла эмда коммунал жумушла бла жалчытыу» федерал программаны толтуруу жаны бла мадарла этиледиле. Къурулуш эм жол мюлк министрни къуллугъун толтургъан Жарашууланы Алимни айтханына кёре,  къырал программа 2018-2025 жыллада толтуруллукъду, анга ахча федерал арадан бёлюнюрюкдю.
КъМР-ни Министрлерини кабинети 1992 жылда 21 августда чыгъаргъан 427-р номерли буйрукъ кючюн тас этгенди. Энергетика, тарифле эм жашау журт надзор жаны бла министрни къуллугъун толтургъан Алим Макуашев билдиргенича, ол коммунал жумушлагъа багъаланы тохташдырыуну низамы алышыннганы бла байламлыды.
«Медицина организацияланы, аланы бёлюмлерини ишлерин тохтатыуну юсюнден оноула къаллай заран салгъанларын ачыкълауну бир-бир сорууларыны юсюнден» бегимни проектине да къаралгъанды. Ол «РФ-де халкъны саулугъун сакълауну мурдоруну юсюнден» законнга тийишилиликде хазырланнганды, деп ангылатханды саулукъ сакълау министрни къуллугъун толтургъан Аслан Кауфов.

Документде жалынчакъсыз тинтиулени бардырыуну низамы тохташдырылгъанды. «Дагъыда саулукъ сакълау учрежденияланы ишлерин тохтатыу жаны бла комиссияны къурауну, бу соруулагъа аталгъан жамауат тынгылауланы бардырыуну жорукълары да белгиленнгендиле»,-дегенди докладчы.
Республикада излегенлерин эркин тапханла юйюрлеге, кеслери алларына жашагъан къолайсыз инсанлагъа къырал социальный болушлукъну тохташдырыуну, аны тёлеуню эм ёлчемини юсюнден Болумгъа тюзетиулени да сюзгендиле жыйылыуда. Урунуу эм социальный къоруулау министр Асанланы Алим ол 2016 жылда 29 декабрьде чыгъарылгъан правительстволу бегим бла келишдирилгенин айтханды. «Тюзетиуле къырал социальный болушлукъ бериуню бир низамгъа келтирирге онг берликдиле»,-деп къошханды.
Культура, саулукъ сакълау, билим бериу эм халкъны социальный жумушларын толтуруу сфераланы организациялары тамамлагъан жумушланы качествосун тинтиуню юсюнден буйрукъну проекти да сюзюлгенди. «Федерал излемлеге кёре, къыралны субъектлерине белгиленнген организацияланы ишлерине жалынчакъсыз багъа бериуню къураргъа борчла салыннгандыла. 2015 жылда 29 январьда къабыл кёрюлген правительстволу буйрукъ бу жумушланы шарт тамамларгъа онг бермейди»,-деп ангылатханды ол.
Министрлени кабинети быйыл 2 июльда чыгъаргъан 372-рп номерли буйрукъгъа тюрлениулени да тюзге санагъандыла. РФ-ни МЧС-ини республикада Баш управлениясыны таматасы Михаил Надежинни айтханына кёре, Эски эм Тёбен Черек эллени араларында Черек сууну жагъасын кючлерге бёлюннген ахча (1,5 миллион сом) къоратылмагъаны бла байламлы аны Урван районнга бериуню юсюнден оноу этилгенди.
«КъМР-де право бузукълукъланы профилактикасы эм жамауат низамлыкъны, жамауат къоркъуусузлукъну кючлеуню юсюнден» къырал программагъа тюрлениуле кийирилгендиле. КъМР-ни Башчысыны Администрациясыны коррупциягъа къажау управлениясыны башчысыны орунбасары Тюбейланы Амирханны айтханына кёре, ол РФ-ни Президенти чыгъаргъан 2018-2019 жыллада РФ-де коррупциягъа къажау миллет план бла келишдирилгенди.
Жыйылыуда башха документле да сюзюлгендиле, ол санда республиканы Архив службасыны структурасы да къабыл кёрюлгенди. Дагъыда жер-жерли власть органлагъа хауле жаныуарланы тутуу, аланы кечиндириу жаны бла бир-бир къырал полномочияла берилгендиле. Ветеринар службаны башчысы Аслан Арамисов айтханыча, ол шахарлада, элледе санитар-эпидемиология болумну игилендирир мурат бла этиледи.

 

 

Тикаланы Фатима.

Поделиться:

ЧИТАТЬ ТАКЖЕ:

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.

28.03.2024 - 09:03

ИНВЕСТИЦИЯЛАГЪА – ЭНЧИ ЭС

Жангы предприятияла къурарча, производствону кенгертирча, инвестицияла этмей, башхача айтханда ишге ахча салмай боллукъ тюйюлдю.

27.03.2024 - 14:04

КЪАБАРТЫ-МАЛКЪАР РЕСПУБЛИКАНЫ БАШЧЫСЫ К.В.КОКОВНУ РОССЕЙ ФЕДЕРАЦИЯНЫ МИЛЛЕТ ГВАРДИЯСЫНЫ АСКЕРЛЕРИНИ КЮНЮ БЛА АЛГЪЫШЛАУУ

Росгвардияны Къабарты-Малкъар Республикада Управлениясыны хурметли аскерчилери, ишчилери эмда ветеранлары! Сизни Россей Федерацияны Миллет гвардиясыны аскерлерини кюню бла алгъышлайма!

27.03.2024 - 09:07

САКЪАТ САБИЙЛЕ ОКЪУУСУЗ КЪАЛМАЗЧА

Къабарты-Малкъарны Жамауат палатасында республиканы билим бериу учреждениялада сакъат эм къыйын ауругъан сабийлени окъутуу не халда болгъаны тинтилгенди.