Россейни Президентини Шимал-Кавказ федерал округда толу эркинликли келечиси  Александр Матовников округну субъектлеринде акъсакъалланы советлерини келечилери бла тюбешгенди. Ушакъны кезиуюнде ёсюп келген тёлюню юйретиуде властьны бла жамауатны араларында байламлыкъланы кючлеуню мадарлары белгиленнгендиле.
Жыйылыуну ача, Александр Матовников тема артыкъда магъаналы болгъанын чертгенди, бютюнда тюрлю-тюрлю кючле регионда жашагъан халкъланы, динлени келечилерини араларында бир бирни кёрюп болмауну ниетлерин жаяргъа кюрешген  кезиуде. «Къаугъаны бизни культура энчиликлерибизге, намыс, дин хазнабызгъа таянып ачаргъа умут этедиле. Бу къужур ишле ёсюп келген тёлюню тюз жолдан тайдырыугъа бурулупдула. Кеслерини бузукъчу ниетлерин толтурур мурат бла жаш адамланы социальный сетьлени болушлукълары бла бир бирлерине къозутуп,   аманлыкълагъа тартыргъа умут этедиле. Быллай болумда власть эм жамауат биригирге, бу къужур ишлеге къажау турургъа керекдиле»,-дегенди полпред.
Къоркъуулу шартланы алгъадан билип, аланы болдурмазгъа кереклисини юсюнден баргъанды сёз. Анда уа граждан обществону баш институтларындан бири акъсакъалланы советлерини магъанасы уллуду.   «Шимал Кавказда таматаланы акъылларына, жашау сынауларына хурмет уллу болгъанды. Аланы сёзлери законнга саналгъанды, бютюнда жаш тёлюге. Регионланы башчыларында акъсакъалланы советлери къуралгъандыла, ветеранланы советлерини регион бёлюмлери тиридиле, Терк къазакъ аскер обществода уа таматаланы совети барды. Шимал-Кавказ федерал округну Жамауат советини къауумунда да старейшиналаны совети ишлейди»,-деп белгилегенди Александр Матовников.
Аны айтханына кёре, ата-бабаларыбызны адет-тёрелерине таяна, жаш тёлюню Туугъан журтубузну патриотлары болургъа,  бирликни  сакъларгъа, кёп миллетли Шимал Кавказны халкъларыны намысларына кертичи болургъа юйретирге тийишлиди.
 Шимал-Кавказ федерал округну Жамауат советинде старейшиналаны советини башчысы, РФ-ни Жамауат палатасыны келечиси, «Бизни Осетия» миллетле аралы жамауат къымылдауну башчысы Вячеслав Лагкуев, КъМР-ни Башчысында Жамауат советни, КъМР-ни Жамуат палатасыны келечиси, «Орус тарыхны бла культураны   «Вече» обществосу» жамауат организацияны таматасы Анатолий Канунников, СКФО-ну Жамауат советинде старейшиналаны советини келечиси, Къарачай-Черкес Республиканы Жамауат палатасыны башчысыны орунбасары, Аш-азыкъ, туризм эм сервис индустрияны колледжини директору Виктор Китаов, Терк къазакъ аскер обществода таматаланы советини председатели Виктор Картушин да жыйылыуда сюзюлген соруу бла байламлы кеслерини оюмларын айтхандыла.
РФ-ни Президентини Шимал-Кавказ федерал округда толу эркинликли келечисини округну субъектлеринде акъсакъалларыны советлери бла тюбешиулерини дайым да бардырыргъа оноу этилгенди.