25 сентября, 2018 - 08:29
КъМР-ни Парламентини президиумуну жыйылыуунда жыйырмагъа жууукъ соруу сюзюлгенди.
Ол санда «КъМР-де гитче эм орталыкъ бизнесни айнытыу» республикалы законну 14-чю статьясына тюзетиулеге къаралгъанды. Экономика, инвестицияла эм предпринимательство жаны бла комитетни башчысы Заур Апшевни айтханына кёре, гитче эм орталыкъ бизнесни предприятияларына къырал болушлукъ бериуню жорукълары федерал излемлеге тийишлиликде тюрлендириледиле.
«КъМР-де къырал къуллукъланы юсюнден» республикалы законну 9-1-чи статьясына эмда «КъМР-де туберкулёзгъа къажау ишни къурауну юсюнден» законну 11-чи статьясына тюзетиуле сюзюлюп, депутатлагъа эмда жууаплы органлагъа берилгендиле. Ала этген предложенияла бла эсгертиуле жыйышдырылып, законланы проектлери ызы бла Парламентни жыйылыуунда тинтилликдиле.
Депутатла федерал законланы проектлерине бла регионлада коллегаларыны башламчылыкъларына да къарагъандыла. Президиум РФ-ни Къырал Думасы быйыл 19 июльда биринчи окъулууда къабыл кёрген «РФ-ни пенсияны тохташдырыуну эм тёлеуню юсюнден бир-бир законодательный актларына тюрлениуле кийириуню юсюнден» 489161-7 номерли законну проектин тинтип, Къырал Думагъа анга тюзетиулени берирге оноу этгенди.
Социальный политика, урунуу эм саулукъ сакълау комитетни башчысы Хусейн Кажаров законопроект биринчи окъулууда сюзюлгенде КъМР-ни Парламенти аны къабыл кёргенин чертгенди.
- Анга РФ-ни инсанларыны къолайлыкъларын игилендириуге, жашау ёмюрлерин кёбейтиуге, жаш тёлюню эм пенсия жыл саннга жетгенлени иш бла жалчытыугъа, тиширыула пенсиягъа чыкъгъан жыл санны азайтыугъа, кёп сабийли аналагъа болушлукъ бериуге бурулгъан къошакъ мадарла кийирилген эдиле. Битеу бу предложенияла уа РФ-ни Президенти Владимир Путин быйыл 29 августда жамауатха этген обращенияда бар эдиле.
Экинчи окъулууда сюзюлюрню аллында уа профильли комитет законнга тюзетиулени хазырлагъанды. Ол санда тиширыула пенсиягъа чыкъгъан жыл санны 60 жылгъа дери азайтыуну эмда эл мюлкде 30 жыл ишлеген инсанланы страховой пенсияларын 25 процентге кёбейтиуню юслеринден предложенияла этилгендиле,-дегенди ол.
КъМР-ни Парламентини пресс-службасы.
