Нейтрино посёлкада мектепни директору бла Къырал Думагъа депутатланы айыргъан кюн тюбейбиз. Къартлыкъланы Фатимат, Зауурбекни къызы, бу окъуу юйде 1991 жылда тарыхдан бла обществознаниядан дерсле берип башлагъан эди. 2017 жылдан бери уа мектепни  директоруду. Ол айтхынчы да эследик, мектепге тынгылы ремонт этилгенин. Алай, менича, кёп къатлы юйню баш этажында жашагъанла, чынг алгъа мекямны башы къалай жабылгъанына эс бурадыла. Не сагъыш этгеними билгенча, директор былай деди: «Бек тынгылы ремонт этилгенди, алай башын къара къагъыт бла жабылгъанына уа ыразы тюйюлбюз. Таулада аллай юй баш эки-юч жылгъа чыдайды. Ол себепден юй баш къанжалдан болса иги эди».
Мектепде 40 сабий окъуйду, сабий садха жюрюгенле уа 30 боладыла. Бюгюнлюкде мында таулу сабийледен сора да, башха миллетлени келечилери окъуйдула, тауча да иги биледиле. 
Биз ушакъны бардыра тургъанлай, Жабелланы Рамазан киреди. Ол да бу мектепни бошагъанды, анасы оруслу болгъанлыкъгъа, малкъар тилде ким да сукъланырча сёлешеди. «Бизни сохталарыбыз Москвадан, Дондагъы Ростовдан, ол неди, тыш къыралладан да сёлешиучюдюле. Ала тауча саламлашсала, бек хычыуун кёрюнеди», – дейди Фатимат Зауурбековна, ала окъутханла билимлери бла кишиден артха къалмагъанларын да черте. 

Суратланы Мамайланы Алий алгъанды.