Урысей ФСИН-м и управленэу КъБР-м щыIэм зэIущIэ щхьэпэ щекIуэкIащ.

IуэхущIапIэм и унафэщI Демидов Александр и тхьэмадэу, КъБР-м и Жылагъуэ кIэлъыплъакIуэ комиссэм (ОНК) хэтхэр, IэнатIэхэм я унафэщIхэр тепсэлъыхьащ ягъэтIысахэр щаIыгъ щIы­пIэхэм щрагъэ­кIуэкI жыла­гъуэ кIэлъы­плъыныгъэхэм кърикIуахэм. ЗэIущIэр трау­хуащ УФСИН-мрэ жыла­-гъуэ лэжьакIуэхэмрэ я зэпы­щIэ­ныгъэр къызэгъэпэ­щы­ным.  
ЗэIущIэр щыщIидзэм, абы хэтахэр дакъикъэкIэ щымащ, уголовно-гъэзэ­щIакIуэ IэнатIэм и лэжьа­кIуэхэу зи къалэн зыгъэзащIэу хэкIуэдахэм я фэ­еплъым пщIэ хуа­щIу. 
АдэкIэ Управленэм и унафэщIыр къыщыпсалъэм къыхигъэщащ шэч зыхуащI­хэр, ягъэкъуаншэхэмрэ ягъэ­тIысахэмрэ медицинэ Iуэху­хэмкIэ къызэгъэпэща зэрыхъур. Зэпкърыхауэ къытеувыIащ цIыхухэр щы­псэу, щылажьэ пэшхэр зы­хуей хуэгъэзэным теухуауэ Iуэху пыухыкIахэр зэрызэфIахым.  
- Пэрыту къонэж лэжьыгъэм зегъэубгъунымрэ нэхъыбэ абы къызэщIегъэу­быдэнымрэ. Мыгувэу ИК-4-м иджыри зы дапIэ цех  къыщызэIуахынущ. КП-5-м зыхуегъэхьэзыр бжьыхьэ­сэм, - жиIащ Демидовым.
КъБР-м и ОНК-м и уна­фэщI Шапсыгъ Азрэт теп­сэлъыхьащ Iэ Iэтыгъуэ махуэр УФСИН-м и IуэхущIапIэхэм нэсу къызэрыщызэрагъэпэщам, комиссэм хэтхэр хэхыныгъэхэр зэрекIуэкIым зэрыкIэлъыплъам. 
Шапсыгъым зэрыжиIамкIэ, илъэсыр къызэрихьэрэ комиссэм хэтхэр 30-рэ щы­Iащ тезырыр щрагъэ­пшын IуэхущIапIэхэм, шэч зы­хуащI­хэм, ягъэкъуаншэ­хэмрэ ягъэ­тIысахэмрэ ящыщу гукъеуэ зиIэхэр щхьэ Iуэху­кIэ абыхэм зыкъы­хуа­гъэ­зэну Iэмал яIащ. Ауэ тхьэу­сыхафэ къаIэрыхьакъым. 
- Щызыгъэгъуазэ, хуиты­ны­гъэм ехьэлIа Iуэхухэр, лекцэхэр идогъэкIуэкI, юрис­тым ечэнджэщыныр пщIэн­шэу къахузыдогъэпэщ, - жиIащ Азрэт. 
Лъэныкъуэхэм къалъытащ ФСИН-м и управленэмрэ  Жылагъуэ кIэлъыплъакIуэ комиссэмрэ илъэс куэд ­хъуауэ купщIафIэу зэдэ­ла­жьэу, адэкIи я Iуэху зэдэ­щIэкIэр ирагъэфIэкIуэну зы­рамурадыр къыхагъэщащ.
ДЫГУЛЫБГЪУ  Жантинэ.