Жыл сайын Россейни регионларында «Кросс нации» деген уллу  эришиуле бардырыладыла. Быйыл да ол  Чабыуну кюнюнде ётгенди эм къыралны Халкъларыны бирликлерини жылына аталгъанды. Саулай алып айтханда, анга 1,5 миллион  адам къатышханды.  
Хар замандача, Нальчикде да ара солуу паркда эришиуле   къууанч  халда башланнгандыла. Аны кезиуюнде гитче спортчула – 500 эм абаданырыкъла да 1000 метр чабаргъа керек болгъандыла. Эришиулеге  ким сюйсе да къатышыргъа эркин эди.   
Нальчикни 1-чи номерли спорт школуну таматасыны волейбол, гитче футбол эм физкультура жаны бла орунбасары Тимур Богатырёв айтханнга кёре, быллай акцияны баш магъанасы жамауатны саулукълу жашаугъа эм спортха тартылырча этергеди. 
Бу жол кроссха окъуучула, спортчула, студентле, предприятияланы бла организацияланы келечилери да,  саулай алып айтханда, беш жюзден аслам адам къатышханды. 
Эсге сала айтсакъ, акция Нальчикде 2004 жылдан бери бардырылады. Андан бери эришиулеге  иги кесек адам къошулгъанды эм жыл сайын аланы саны кёбейе барады. 
Бюгюн жаш спортчула, кеслерин сынагъандан сора да, эришиуледен зауукълукъ алгъанларын да билдиргендиле. Ол санда школчула Эвелина эм Ангелина Демьянла айтханларыча, ала чабаргъа жюрюгенли, эки жыл чакълы болады.  «Саулугъуму кючлерча чабама эм спортну бу тюрлюсюн бек жаратама. Арт заманда жараула этгеними хайыры бла кючлю эм тёзюмлю болгъанымы да сеземе», - дейди Эвелина. Ангелина да, спорт, кюч бергенден сора да, эришиуледе жетишимле болдурургъа себеплик этгенин букъдурмайды.   
Эришиулени ахырында биринчи жерлеге чыкъгъанла майдалла, дипломла эм эсде къалырча  саугъалагъа тийишли болгъандыла. Кроссха къатышханла кеслерин сынаргъа, бирсиле бла бирге эришиулеге къатышыргъа келгенлерин эм быллай кезиуле жангы жетишимлеге кёллендиргенлерин да айтхандыла.  

Курданланы Сулейман.