Жангы Малкъарда Маданият юйню таматасы Локияланы Анжела бизге бусагъатда ишлеринде болумну юсюнден айтханды:
- Баям, элледе Маданият юйлени жарсыулары бир кибик болурла. Баш жарсыу – бизге керекли специалистлени табалмайбыз. Кесибизни элибизден болсала, иги боллукъ эди. Бир заманда Нальчикден келип тургъанды хореограф. Анга алтмыш жаш жюрюй эдиле! Алай жол узагъыракъ болгъаны себепли, тышындан келгенле бираздан кетип къаладыла. Дагъыда барды фахмулу къызыбыз Усубекланы Айсурат, ол «Балкарияда» да тепсей эди. Эрге Москвагъа чыкъгъанды, бусагъатда анда жашайды. Биз а биягъы хореографсыз турабыз. Мен кесим беш къызчыкъны тепсерге юйретеме, «Малкъарны жулдузлары» деген ансамбль къурагъанбыз. Район, республикалы байрамлагъа къатышабыз. Эришиулеге да барабыз, Осетияда лауреат атха тийишли болуп къайтханбыз.
Суратчы да керек эди, жокъду. Театргъа да эс буруп тургъандыла бизни Маданият юйде. Сёз ючюн, 2019 жылда Токумаланы Жагъафарны пьесасына кёре Жангы жылгъа спектакль салыннган эди. Эллиле бек бюсюреген эдиле. Дагъыда 2020 жылда сабийле ойнагъан спектакль салыннганды - «Къоншула». Арт жыллада кесибиз зат салмагъанбыз, алай Къулийланы Къайсын атлы театр келеди бизге, аны хайырындан сабийле профессионал театр къаллай болгъанын биледиле.
Дагъыда школчуланы кино бла шагъырейлендирирге онгубуз барды. Фондубузда мультфильмлени эм фильмлени проектор бла кёргюзтебиз. Хау, бусагъатда хар адам кесини телефонунда да къараяллыкъды фильмлеге, алай уллу экранда къарагъан башхады.
Жарсыугъа, жерибиз эркинди деп махтаналлыкъ тюйюлбюз. Биз элни администрациясыны мекямындабыз, алгъын мында спорткомплекс болгъанды. Кружокларыбыз да, жерибиз да кёбюрек болсала, эллиле бек сюерик эдиле. Болсада бусагъатда да ишибизни бардырабыз. Шабат кюнледе китапла окъуйбуз. «Общество книголюбов» бардыргъан эришиулеге да къатышабыз. Сулейман Джалалов да уллу иш бардырады, сабийлени жырларгъа эм пианинода согъаргъа юйретеди.
Маданият юй, китапхана (ол да бу мекямдады), школ – биз барыбыз да бирге ишлейбиз. Байрамлагъа, эришиулеге да бирлешип, номерлени алай хазырлайбыз. Къысхасы, къолубуздан келгенича ишлейбиз, алай алыкъа этер ишибиз кёп болгъаны баямды.
Байсыланы Марзият.
