Гъэ еджэгъуэщIэм и пэ къихуэу хъыбар гуапэ къы­тIэ­рыхьащ. УФ-м и ТхакIуэхэм я зэгухьэныгъэм, Кавказым и ТхакIуэхэм я клубым хэт, УФ-м егъэджэныгъэмкIэ щIыхь зиIэ и лэжьакIуэ, Бахъсэн къалэм и курыт еджапIэ №3-м и егъэ­джакIуэ Мэржэхъу ФатIимэ щытекIуащ «Сказитель Руси. Легенды и мифы России» зэпеуэм. Ар къызэригъэпэщащ УФ-м и ТхакIуэхэм я зэгухьэныгъэм.

Зэхьэзэхуэм нэхъыфIу къыщалъытащ сабийхэм папщIэ Мэржэхъу ФатIимэ и Iэдакъэ къыщIэкIа «Сказания о Сосруко» къыдэкIыгъуэр икIи УФ-м и ТхакIуэхэм я зэгухьэныгъэм и щIыхь тхылъымрэ Донской Дмитрий и «За сохранение исторической памяти» медалымрэ къыхуагъэфэщащ. Тхылъым рецензэ хуитхащ Адыгейм щыщ щIэныгъэлI цIэрыIуэ, IуэрыIуатэдж Къуиикъуэ Асфар.
Мэржэхъу ФатIимэ Бахъсэн къалэм къыщалъхуащ. ­КъБКъУ-м­ и филологие факультетым хамэ къэралыбзэхэр джы­нымкIэ и къудамэр къиухауэ Бахъсэн къалэм и курыт еджапIэ №3-м щрегъаджэ. И тхылъиплI дунейм къытехьащ (абы щыщу тIур нэгъуэщI тхакIуэ и гъусэу). И IэдакъэщIэкIхэр Урысейм, ди республикэм къыщыдэкI литературэ журнал зэмы­лIэу­жьыгъуэхэм къытохуэ, и тхыгъэхэр инджылызыбзэкIэ, абхъазыбзэкIэ, куржыбзэкIэ зэрадзэкIащ. 2019 гъэм Куржым щыт­радза, Кавказым и усакIуэхэм я IэдакъэщIэкIхэр щызэ­хуэхьэса «Антология поэзии» къыдэкIыгъуэм хагъэхьащ ФатIимэ и къалэмыпэм къыщIэкIахэр. КъыжыIапхъэщ, куржыбзэкIэ зэрадзэкIа и усэхэм Куржым и Къэрал саугъэтыр 2020 гъэм къызэрыхуагъэфэщар. Мэржэхъу ФатIимэ Дунейпсо Арт  комитетым къритащ «Къэбэрдейр Урысейм зэрыгухьэрэ илъэс ­460-рэ зэрырикъум и щIыхькIэ», «ЩоджэнцIыкIу Алий къызэралъхурэ илъэси 120-рэ зэрырикъум и щIыхькIэ» дыщэ медалхэр. КъинэмыщIауэ, дуней псом щыпсэу лъэпкъхэм я Евразие ­ассамблеем, Къэзахъстаным и ТхакIуэхэм я зэгухьэныгъэм я щIыхь тхылъхэр, Кавказым и усакIуэхэм я фестивалым и лауреат зэрыхъуам щыхьэт техъуэ щIыхь тхылъыр къратащ. 2021 гъэм Стамбул щекIуэкIа, ЛИФФТ-м и Евразие фестивалым хэта усакIуи 196-м ящыщу нэхъыфIу къыщалъыта усакIуи 10-м ящыщщ. Ар, дауи, ехъулIэныгъэшхуэщ.
ФатIимэ зэрыжиIэмкIэ, ар тхэным тезыгъэгушхуар Пушкин Александр и таурыхъхэрщ, иджырей унагъуэхэм я щIэблэм нарт IуэрыIуатэр усэ жыпхъэм иту саугъэт яхуищIынырщ. IуэрыIуатэм и лIыхъужьхэм я зэфIэкIыр усэ жыпхъэм тету ­къиIуэтэжыну Мэржэхъум къалэн зыщищIыжащ, мы тхылъыр унагъуэкIэрэ зэIэпахыныр щхьэпэу къелъытэри. УФ-м и Президент Путин Владимир Урысейм и лъэпкъхэм я зэкъуэтыныгъэм и илъэсу 2026 гъэр щигъэувам, унагъуэкIэрэ зэгъусэу тхылъ еджэныр яублэжыну къыщыхуриджам, ар нэхъри Iуэхум тригъэгушхуащ икIи и Iэрытхыр иригъэхьащ «Сказитель Руси» урысейпсо литературэ зэпеуэм. УсакIуэ, тхакIуэ цIэрыIуэхэр зыхэт зэ­хьэзэхуэм пхыкIыну апхуэдэу щымыгугъами, и лэжьыгъэр нэ­хъыфIу къалъыта тхыгъихым яхэхуат. 
УсакIуэм фIыщIэ хуищIащ и тхылъыр сурэт щхъуэкIэп­лъыкIэхэмкIэ зыгъэдэха, Бахъсэн къалэм и курыт еджапIэ ­№8-м сурэт щIынымкIэ щезыгъаджэ художник КIыпший Розэ. ЛIэщIыгъуэ минхэр къызэзынэкIа, нэхъыжьхэм щIэину къытхуа­гъэна IуэрыIуатэр зи лъабжьэ «Сказания о Сосруко» тхылъым къы­щыгъэлъэгъуэжащ ди лъэпкъыр нэгъуэщIхэм къазэрыщ­хьэ­щыкI щапхъэхэр, дыкъызыхэкIам гъунэгъу дыхуещI икIи ­дигу къегъэкIыж Кавказым щыпсэу лъэпкъхэр я щэнхабзэрэ гъэсэныгъэкIэ зыхуэдар. 
Мэржэхъу ФатIимэ фIыщIэ хуэфащэщ лъэпкъ IуэрыIуатэм хэлъхьэныгъэ зэрыхуищIымрэ ар хэIущIыIу зэрищIымрэ папщIэ. ДяпэкIи и IэщIагъэм ехъулIэныгъэхэр щиIэну ди гуапэщ.

ТЕКIУЖЬ Заретэ.