Бу кюнледе Къабарты-Малкъар Республиканы ич ишле органларыны ветеранларыны советини кенгеши бардырылгъанды. Анга МВД-ны, Аскер комиссариатны, прокуратураны ветеранларыны советини эм башха ведомстволаны келечилери да къатышхан эдиле, деп билдиргендиле КъМР-де МВД-ны пресс-службасындан.

Жыйылыуну баш темасы келир айда айырыулагъа хазырланыу болгъанды. Ич ишле органларыны ветеранлары ол кезиуде право низамны эмда инсанлыкъ жууаплылыкъны жалчытыу жумушха тири къатышыр умутлудула.
Ушакъда тёлюлени араларында байламлыкълагъа уллу эс бурулгъанды. Ол санда Элбрус районда ветеран организациягъа жер бериуню, МВД-да ишлерге сюйгенлени сайлаугъа таматаланы къатышдырыуну юсюнден да сёлешиннгенди. 
Ушакъда жаш тёлюню патриот ниетде  юйретиуге энчи магъана берилгенди: ветеранла Нальчикге чабыууллукъгъа эмда Бесланда болгъан бушуулу ишлеге аталгъан «Кишиликни дерслерин» школлада бардырып турургъа хазырдыла.
Тюбешиуде социал соруула да кётюрюлгендиле: МВД-ны медицина бёлюмюню келечилери кёпге созулгъан аурууладан къыйналгъан ветеранланы дарманла бла  жалчытыу не халда болгъанын билдиргендиле. Жыйылыуда пенсиячыланы онгдуруу жаны бла  социал программала да сюзюлгендиле.
Кенгешни ахырында ветеранланы советини  башчысы Муаед Пихов КъМР-де МВД-гъа эмда МВД-ны СКФО-да Баш управлениясына ветеран биригиулеге  себеплик этип тургъанлары ючюн  ыразылыгъын билдиргенди, коллегаларына да  ишлерин бет жарыкълы бардыргъанлары  ючюн ыспас этип, ветеран организацияланы эмда ведомствону бёлюмлерини араларында байламлыкъланы кючлендирирге  чакъыргъанды.
Омарланы Мурат 
хазырлагъанды.