ШыщхьэуIум и 27-м Налшык къа­-лэм ЩIалэгъуалэм я унэм щызэхэ- тащ фокIадэм и 18 - 20-хэм екIуэкIы-  ну хэхыныгъэхэм шынагъуэншагъэр къы­зэрыщызэрагъэпэщынум теухуа зэхыхьэ. 

Ар къыщызэIуихым, КъБР-м и ХэхакIуэ комиссэм и унафэщI Джэш Вячеслав жиIащ къэрал мыхьэнэ зиIэ Iуэхур бэIутIэIуншэу зэфIагъэкIыным-кIэ жэуаплыныгъэшхуэ зэрахьыр. «Дзэ Iуэху хэхар щекIуэкI зэманым хэхыныгъэхэр шынагъуэншэу къызэдгъэ­пэ­щыным псори зэгъусэу делэжьып-хъэщ. УФ-м и Федеральнэ Зэхуэсым и Къэрал Думэм и ебгъуанэ зэхуэсы­гъуэмрэ щIыпIэ унафэр зезыхьэ IэнатIэхэмрэ я депутатхэр хэхыныр нэры­лъагъуу икIи зэIухауэ щытын хуейщ. Дэ ди къалэнщ хэхакIуэм и Iуэху еплъыкIэр къигъэлъэгъуэну къыщыкIуэкIэ ар и шы­нагъуэншагъэм темыгузэвыхьу и ­хуитыныгъэхэр игъэзэщIэным дыкIэ­лъыплъыну. Махуищым къриубыдэу Къэбэрдей-Балъкъэрым и щIыналъэм хэхакIуэ кампаниеу 122-рэ щыIэнущ. ХэхыпIэхэм щылэжьэнухэм щхьэж и ­къалэныр нэгъэсауэ игъэзэщIэн ­хуейщ», - жиIащ Джэшым.
Абы фIыщIэ яхуищIащ КъБР-м и МЧС-м, Урысей гвардием и щIыналъэ къудамэм, Къэбэрдей-Балъкъэрым ­медицинэ къэхъукъащIэхэмрэ дэIэ­пыкъуныгъэ псынщIэмкIэ и IуэхущIапIэм Iутхэмрэ психолог-экспертхэмрэ. «Фэ фи IэщIагъэм фызэрыхуэIэкIуэ­лъакIуэмрэ фызэрысакъымрэщ къэб­лагъэ хэхыныгъэхэм зэпIэзэрыты­ныгъэ щыщыIэным и лъабжьэр. Зэкъуэту ды­зэдэлажьэмэ, IэIэтыр ныкъусаныгъэн­шэу едгъэкIуэкIыфынущ», - дыщIи­гъуащ къэпсэлъам.
- Нобэ ди мурад нэхъыщхьэр хэха­кIуэ комиссэхэм хэтынухэр IэIэтым сыт и лъэныкъуэкIи хуэдгъэхьэзырынырщ, - пищащ КъБР-м и ХэхакIуэ комиссэм         и унафэщIым и къуэдзэ Джаппуев Мусса. - Псом хуэмыдэу ар зэхьэлIар хэхы­ныгъэхэр щекIуэкIкIэ дызыпэмыплъауэ Iуэхугъуэ шынагъуэ гуэр къыкъуэкIмэ, дэтхэнэми ищIэн хуейр гурыдгъэ­Iуэ­нырщ. УФ-м и Конституцэм цIыхухэм ­хуитыныгъэ ярет хэхыныгъэхэм хэтыну. «Хэхыныгъэгъэхэм ехьэлIауэ шэсыпIэ нэхъыщхьэхэр» Федеральнэ Законым къигъэувращи, къэрал къулыкъущIапIэхэм я пщэрылъщ жылагъуэ шына­гъуэншагъэм кIэлъыплъыну. Зэрызе­-хьэ къыщыхъу хабзэр Iуэхур гъэбелджылауэ щыщымытым и дежщ. Абы къыхэкIыу, дызэрыщIэу дызэдэлэжьэн хуейщ». Джаппуевым зэрыжиIамкIэ, щы­тыкIэ хэхахэм деж IэIэтыр къы­зэ­пымыуду икIи къызэтемыувыIэу екIуэ­кIын щхьэкIэ, хэхыпIэ псоми резерв пэшхэр ягъэхьэзырауэ яIэнущ. 
КъБР-м щыIэ МВД-м къэрал къу­лыкъущIапIэхэм ядэлэжьэнымрэ жы­лагъуэ зэпIэзэрытыныгъэр хъумэныр къызэгъэпэщынымкIэ и къудамэм и ­инспектор нэхъыжь, полицэм и майор Шакъ Казбек тепсэлъыхьащ хэхыныгъэхэр щекIуэкI махуэхэм терроризм щIэпхъаджагъэ гуэр ялэжьыну хъыбар къаIэрыхьэмэ, псом япэу ящIэн хуейхэм. Абы къызэхуэсахэм ягу къигъэкIыжащ 2024 гъэм Урысей Федерацэм и Президент хэхыныгъэхэр бэIутIэIуншэу зэрырагъэкIуэкIыфар. Шакъым къыхигъэщащ щIэпхъаджагъэ зэрахьэнкIэ шынагъуэ щыIэу хэхыпIэхэм щылэжьэнухэм телефонкIэ, «смс»-кIэ е нэгъуэщI Iэмал гуэркIэ хъыбар къаIэрыхьэмэ, ар нэпцIу къыщIэкIынкIэ хъунуми, гулъы­тэншэу къагъанэ зэрымыхъунур. 
Къэпсэлъам зэрыжиIамкIэ, бюллетенхэр къыщашэ махуэм щегъэжьауэ (хэхыныгъэхэр щекIуэкIынум иджыри махуитI иIэу) шынагъуэншагъэм кIэ­лъып­лъынущ къэрал кIуэцI IуэхухэмкIэ IэнатIэхэм я лэжьакIуэ 5600-рэ. «Ап­хуэ­дэуи къыддэIэпыкъунущ Урысейм и МВД-м и Кавказ Ищхъэрэ институтыр, суд приставхэм я федеральнэ Iэна­тIэр, Урысей гвардием хэт цIыху 788-рэ. ­Резерву диIэнущ полицэм и лэжьакIуи 143-рэ Урысей гвардием и лIыкIуэу           100-м щIигъурэ. Ику иту къэбгъэлъа­гъуэмэ, хэхыпIэ къэс къэрал кIуэцI IуэхухэмкIэ IэнатIэхэм я лэжьакIуэу цIы­хуи 3-м къыщыщIэдзауэ 6-м нэс щIэ­тынущ. КъищынэмыщIауэ, жылагъуэ зэпIэзэрытыныгъэм кIэлъыплъыну щхьэзакъуэ IуэхущIапIэхэм я хъумакIуи 108-рэ махуэ къэс къыддэIэпыкъуну ­делъэIуащ, цIыхубэ дружинэхэм хэту 320-рэ, къэзакъ зэгухьэныгъэм хэту  105-рэ (апхуэдэхэр здэщыIэ Май, Прохладнэ районхэм) тщIыгъунущ. Ды­щогугъ хэхыныгъэхэр къыдэхъулIэну», - дыщIигъуащ Шакъым.
Урысей гвардием и къудамэу Къэбэрдей-Балъкъэр Республикэм щыIэм жы­лагъуэ зэпIэзэрытыныгъэр хъу­мэ­ныр дзэхэр хэту къызэгъэпэщынымкIэ и ­къудамэм и унафэщI, подполковник Сергиенкэ Вазген тепсэлъыхьащ цIы­хубэ зыхъумэжыныгъэм къыхураджэу хъыбар щагъэIукIэ (хьэуа гузэвэгъуэ е ракетэ шынагъуэ щыIэу) ящIапхъэмрэ цIыху куэд зыхэт зэрыхьзэрийхэм деж къагъэсэбын хуей Iэмалхэмрэ.
Май щIыналъэ хэхакIуэ комиссэм и унафэщI Канаевэ Наталье и гугъу ищIащ IэIэтым зэрызыхуагъэхьэ­зы­рым­рэ щытыкIэ шынагъуэхэм деж цIыхухэр хэхыпIэхэм къыщIэгъэIэпхъукIыныр зи пщэ дэлъынухэр зэрагъэбелджылым-рэ.
ЗэIущIэм и етIуанэ Iыхьэм кибершынагъуэншагъэр зыхуэдэм, япэ дэIэпыкъуныгъэ зэрыхуащIэ хабзэхэм, хэха­-кIуэ комиссэхэм щIэтыну IэщIагъэлI- хэр гъэхьэзырыным щытепсэлъыхьащ ­КъБР-м Бжыгъэхэр зи лъабжьэ зыу­жьыныгъэмкIэ, связымрэ цIыхубэ коммуникацэхэмкIэ и министерствэм кибершынагъуэншагъэм теухуауэ и Iэ­щIагъэлI нэхъыщхьэ Созаев Ильяс, Къэбэрдей-Балъкъэрым медицинэ ­къэхъукъащIэхэмрэ дэIэпыкъуныгъэ псын­щIэмкIэ и IуэхущIапIэм и егъэ­джэныгъэ IэнатIэм и унафэщI, дохутыр анес­тезиолог-реанимотолог Карабакин Юрий, психолог, Когнитив-зыIыгъыкIэ психотерапиемкIэ Европей зэгухьэныгъэм хэт Темыркъан Лейлэ сымэ.
Зэхыхьэм и кIэм хэхыпIэхэм я уна­фэщIхэр зыщIэупщIахэм я жэуап иратащ къэпсэлъахэм.

Тхыгъэри  сурэтри
БАГЪЭТЫР  Луизэ ейщ.