Бу кюнледе Нальчик шахарда КъМР-ни Жаш тёлюню ишлери жаны бла министерствосуну мекямында айырыу участкалада къол кётюрюуню кюнлеринде - 18-20-чы сентябрьде – къоркъуусузлукъну жалчытыугъа аталгъан семинар-кенгеш кенг халда бардырылгъанды. Анга участка айырыу комиссияланы таматалары, ведомстволаны башчылары, кюч структураланы келечилери, медикле эмда экспертле къатышхандыла.
Аланы КъМР-ни Айырыу комиссиясыны таматасы Вячеслав Гешев алгъышлагъанды. «Бюгюн бизни боюнубузгъа уллу къырал жууаплылыкъ салыннганды – 2026 жылны айырыу кампаниясын тюзлюк бла бардырыргъа. Бу къыйын заманда биз битеу кючюбюзню бирикдирип, жумушубузну айыпсыз тамамларгъа, РФ-ни Къырал Думасына эмда республиканы жер-жерли самоуправление органларына депутатланы айырыуланы ачыкъ эмда не къадар къоркъуусуз болумда ётдюрюрге борчлубуз. Биз участкагъа келген хар айырыучу кесин къорууланнганын сезерча, комиссияланы келечилери уа борчларын тийишлисича толтурурча къолубуздан келгенни аямазгъа керекбиз», - дегенди ол.
Андан ары семинарда сегиз соруу кётюрюлгенди. Хар бирине спикерле жууапла бергендиле. Алай бла КъМР-ни Айырыу комиссиясыны таматасыны орунбасары Джаппуланы Мусса айырыуланы кезиуюнде къоркъуусузлукъну жалчытыуну магъанасы бек уллу болгъанын чертгенди. «Бусагъатда бизден къуралыулукъ, терк амал табыу эмда не тюрлю болумлагъа да хазыр болуу изленеди. Къуралыулукъ болмагъан жерде гузаба башланады. Не тюрлю болумлада да ишибизни бет жарыкълы тамамларгъа борчлубуз», - дегенди.
КъМР-де МВД-ны жамауат низамны сакълауну эмда толтуруучу власть органла эмда жер-жерли самоуправление органла бла бирге ишлеуню къурау жаны бла бёлюмюню тамата инспектору полицияны майору Казбек Шаков къол кётюрюулени кезиуюнде терроризм бла байламлы аманлыкълагъа неда къоркъуулагъа къажау не мадарла белгиленнгенлерини юслеринден айтханды.
РФ-ни МЧС-ини КъМР-де Баш управлениясыны надзор эмда профилактика ишни управлениясыны таматасыны орунбасары ич службаны полковниги Алим Тарчоков а от тюшгенде, тютюн чыкъгъанда, башха къыйын болумлада не этерге кереклисин ангылатханды.
Росгвардияны КъМР-де Управлениясыны аскерлени жамауат низамны сакълаугъа эмда къалауурлукъ ишлени тамамлаугъа къошууну жалчытыу жаны бла бёлюмюню таматасы подполковник Вазген Сергиенко келгенлеге граждан къоруулауну белгилерини юслеринден билдирилгенде этиллик мадарланы юслериндлен айтханды. Кёп адам низамгъа бузукълукъ этген заманда кесин къалай жюрютюуню жорукъларын эсгертгенди.
Май районну жер-жерли айырыу комиссиясыны таматасы Наталья Канаева айырыу участкала къол кётюрюулеге къалай хазырланнганларыны юсюнден билдиргенди. Дагъыда адамланы къоркъуусуз жерлеге кёчюргенде, комиссияланы келечилерини борчларын туура этгенди. Айырыу участкалада видео системала орнатылгъанларыны, дагъыда къол кётюрюулени бир кюнюнде битеу комиссияланы полициячыла сакъларыкъларыны юслеринден айтханды.
КъМР-ни Цифралы айныу, связь эмда асламлы коммуникацияла министерствосуну кибер къоркъуусузлукъ бёлюмюню баш специалисти-эксперти Созайланы Илияс жыйылгъанлагъа кибер къоркъуусузлукъну мурдорларын ангылатханды. Интернетде къаллай хыйлалыкъла этилгенлерин эмда адам кесин аладан къалай сакъларгъа боллугъун ангылатханды.
Къабарты-Малкъарны Катастрофаланы медицинасыны эм терк медицина болушлукъ бериу арасыны окъуу арасыны таматасы, энчи борчла толтургъан мобиль медицина отрядны анестезиологу-реаниматологу, врач Юрий Карабакин биринчи болушлукъ этиуню жорукълары бла шагъырейлендиргенди. Ол биринчи болушлукъ этилген кезиулени тизмесин окъугъанды. Артда уа гинжиледе биринчи болушлукъ бериуню жашау магъаналы амалларын кёргюзтгенди.
Тюбешиуню ахырында психолог, Психотерапия жаны бла европалы биригиуню келечиси Лейла Темирканова участка айырыу комиссияны келечилерини психология жаны бла хазырланыуларыны юсюнден айтханды.
Кенгешде айтылгъан затлагъа кёре айырыула бла байламлы ишлени регламенти жарашдырылгъанды.
Додуланы Мадина.
