Усталыкъланы республикалы арасында «Анна» клубну кёрмючю бардырылгъанды. «Анна» жюз бла онжети адамны бирлешдиреди, анда элли беш жыллары толгъанла чыгъармачылыкъ эм спорт бла кюрешедиле. Клубну «СоТворчество» проекти быйыл маданият башламчылыкъланы президент фондуну грантына тийишли болгъанды. Сёзсюз, грантны ахчасы бу клубну ишин айнытырыкъды эм жангы амалла ачарыкъды. 

Кёрмючде къагъыт пластика энчи жерни алгъанды, бусагъатда бу жангы иш кёплени жюреклерин бийлейди. Сора дарий тасмала бла накъыш салыуда, ыргъакъ бла эшиуде да бизни усталарыбызны ёхтемленирча жетишимлери болгъаны ачыкъланнганды. Хар ишлерине жанларыны бир кесегин салгъандыла таматала! 
КъМР-ни Миллетлени ишлери эм жамауат проектле жаны бла министерствосуну бёлюмюню башчысы Эльберд Коцев: «Шёндюге дери «Анна» клуб бизни грантларыбызгъа тийишли болуп тургъанды, алай быйыл а биринчи кере Президент грантха бергендиле да проектлерин, аны да алгъандыла! Клубну башчысы Марина Жиздюк уллайгъан адамлагъа бек сейир проектле хазырлайды», - дегенди. 
КъМР-ни сатыу-алыу эм промышленность палатасыны  башчысы Хасан Гукетлов да таматалагъа деп къуралгъан ишле магъаналы болгъанларын чертгенди. Кёпле ишлерге, жангы усталыкълагъа юйренирге итинедиле, алагъа аллай онгла берирге керекди. «Бизни палатабыз къолундан келгенича огъурлу ишигизге болушургъа хазырды», - дегенди ол. 
«Аннаны» башчысы Марина Жиздюк: «Биз 2024 жылдан башлап, талай проектни жашауда бардыргъанбыз, - дегенди. - Бюгюнден а КъМР-ни Миллетлени ишлери эм жамауат проектле жаны бла министерствосу бла бирге грант проектни бардырлыкъбыз, анга нейрографика, гимнастика эм таякъла бла жаяу жюрюу киредиле. Клубха жангы адамла келедиле, ол къууандырады: ала бизге ышанадыла, жашауларында, саулукъларында да игиге тюрлениуле боллугъуна ийнанадыла. Биригиуюбюз кёпден кёп болуп баргъанлыкъгъа, тар а тюйюлбюз. КъМР-ни Жаш тёлю министерствосу, Маданият айныуну арасы, Халкъ усталыкъланы арасы бизге болушадыла, аланы залларында ишибизни бардырабыз».
Былайда энчи чертирге керекди: клубха жюрюгенле усталыкъла бла байламлы дерсле неда спорт ишле ючюн хакъ тёлемейдиле. Аны хайырындан пенсиялары аз болгъанла да «Аннагъа» сюйюп жюрюйдюле. 
Уста Мисакланы Вера: «Чыгъармачылыкъ адамланы бирлешдиреди. Бизни дерслерибизден сора къыйналып атлагъан къартла юйлерине женгил жюрюп кетедиле, бизде таякъларын окъуна унутуп! Адамны саулугъу кёлю бла байламлыды. Кёлю кётюрюлсе, къууанса, ауруулары да кетип башлайдыла. Халкъ усталыкъланы арасы Крылов атлы орамда мастерской бергенди. Дагъыда Жаш тёлюню юйюнде эм Маданият айныуну арасында да барды мастерскойларыбыз. Ала шахарны башха районларында болгъанлары себепли хар уллайгъан адам юйюне жууугъуракъ мастерскойгъа барады», -дегенди.
Жыйылыу концерт бла бошалгъанды. Артистле уллайгъан адамлагъа жырла саугъалагъандыла, таматала уа уста тепсей билгенлерин кёргюзтгендиле. 

Байсыланы Марзият.