«Къэбэрдей-Балъкъэрым туризмэмрэ альпинизмэмрэ ехьэлIа IэнатIэм шынагъуэншагъэр къыщызэгъэпэщын» Iуэхум теу­хуа брифинг щекIуэкIащ республикэм и щыхьэр Налшык. Абы хэтащ туризмэм зегъэужьынымкIэ жэуап зыхь IэнатIэхэм я лIыкIуэхэр. 

Урысей МЧС-м и управленэ нэхъыщхьэу КъБР-м щыIэм  и пресс-IуэхущIапIэм и унафэщI Бер Къантемыр къызэхуэ­сахэм ягу къигъэкIыжащ Къэбэрдей-Балъкъэрыр бгылъэ ­туризмэмрэ альпинизмэмкIэ Урысейм и центрхэм ящыщ зыуэ зэрыщытыр. Республикэм и щIыналъэм щыIэщ метр мини 5 зи лъагагъ къуршхэу къэралым ит 8-м щыщу 7-р, «Iуащ­хьэмахуэ лъапэ» турист кластерыр цIэрыIуэ дыдэщ. ЩIыналъэм и щIыуэпс щытыкIэхэм - бгы лъагэм, мылылъэм, рельеф гугъум - къегъэув гуп зэгъэуIуахэми, щхьэзакъуэ зып­лъыхьакIуэхэми шынагъуэншагъэм гулъытэ хэха хуа­щIын ­хуейуэ. Илъэсыр къызэрихьэрэ республикэм и бгыхэм цIыху­хэр къыщегъэлыным пыщIа Iуэху 56-рэ щрагъэкIуэ­кIащ, цIыху 12 хэкIуэдащ. 
Къэбэрдей-Балъкъэрым и бгыхэм шынагъуэншэу щызекIуэн папщIэ альпинистхэр зыхуеину фэилъхьэгъуэхэр, Iэмэпсымэхэр Урысей МЧС-м и Iуащхьэмахуэ бгы лъагэ къэлъыхъуа­кIуэ-къегъэлакIуэ гупым и «Налшык» къудамэм и унафэщI Гу­лиев Мухьэммэт игъэлъэгъуащ. Ар тепсэлъы­хьащ Iуащхьэмахуэ, Безенги аузым и къуршхэм дэкIыну ­гъуэгуанэ техьэ альпинистхэмрэ туристхэмрэ зыIууэнкIэ ­хъуну гугъуехьхэм, гулъытэ зыхуащIыпхъэхэм. 
УФ-м и Следственнэ комитетым и Следственнэ управ­ленэу КъБР-м щыIэм и унафэщIым и дэIэпыкъуэгъу нэхъыжь Багъ Мурат къытеувыIащ Къэбэрдей-Балъкъэрым и бгыхэм туристхэмрэ альпинистхэмрэ щIыщыхэкIуадэм и щхьэусыгъуэ нэхъыщхьэхэм, щхьэхуэу къыхигъэщащ бгы­хэм къыщыхъуа насыпыншагъэхэм ехьэлIа Iуэхухэр зэрызэхагъэкI щIыкIэм, зытетыпхъэ хабзэхэр зыплъыхьакIуэхэм къы­зэпамыудыным хуэгъэзауэ ирагъэкIуэкI лэжьыгъэхэм. 
КъБР-м щыIэ МВД-м и лIыкIуэ Махъсидэ Аслъэн теп­сэлъыхьащ зыщаплъыхь щIыпIэхэм жылагъуэ хабзэр къы­щызэгъэпэщынымрэ полицэм и лэжьакIуэхэм зэфIах гурыгъэIуэныгъэ лэжьыгъэхэмрэ. Апхуэдэуи къыхигъэщащ инструктор-гъуэгугъэлъагъуэхэм Iуэхум зэрыхащIыкIыр къапщытэу зэщIыгъуу рейдхэр зэрырагъэкIуэкIыр. 
Туристхэм я шынагъуэншагъэр сыт щыгъуи гулъытэ зыхуэщIыпхъэу къы­зэрынэжыр КъБР-м Курортхэмрэ туриз­мэмкIэ и министерствэм и ­къудамэм и унафэщI Къаскъул Виолеттэ жиIащ. Абы ахэр къыхуриджащ зи IэщIагъэм хуе­джа инструктор-гъуэгугъэлъагъуэхэм я Iуэхутхьэбзэхэр къагъэ­сэбэпыну, япэщIыкIэ ахэр федеральнэ реестрым итмэ ­зрагъэщIэну икIи щIатыну пщIэр зэрымащIэм тращIыхьу, ­IэнатIэм фIыуэ хэзымыщIыкIхэм я Iуэхутхьэбзэхэр къыхамыхыну. Абы зэрыжиIащи, бгылъэ туризмэм адэкIэ зиу­жьы­нукъым, жэуаплыныгъэ яхэлъу а Iуэхухэм бгъэдэмыхьэмэ, ар къэралым, туризм бизнесымрэ езы зыплъыхьакIуэхэмрэ я зэхуэдэ къалэнщи. 
Псори къызэщIакъуэжри, брифингым хэтахэм жаIащ ­къуршхэм зыщызыгъэпсэхуну зыфIэфIхэм я шынагъуэншагъэр къызэгъэпэщыныр адэкIэ егъэфIэкIуэным мыхьэ­нэ­шхуэ зэриIэр. 
 УАРДЭ Жантинэ.