КъМР-де ич ишле органлада къуллукъ этгенлени сабийлерини аталары бла аналары къайда ишлегенлерин кёрюрге, аланы низамлыкъны сакълауда борчларыны энчиликлерин ангыларгъа онглары болгъанды. Ол мурат бла къуралгъан жолоучулукъ Къырал автоинспекциядан башланнганды, деп билдиргендиле бизге КъМР-де МВД-ны пресс-службасындан.
Къонакълагъа жол-патруль службаны энчи батальонунда техниканы кёргюзтгендиле, ала, патруль машинаны ичинде олтуруп, кеслерин жолда жюрюуню къоркъуусузлугъуну инспекторуну орунунда сынагъандыла. Ызы бла алагъа спорт залда энчи жараула къуралгъандыла. Жашла бла къызла, полициячыланы ызларындан къайтарып, спортда кючлерин, сынауларын кёргюзтгендиле.
Андан ары Эксперт-криминалист араны иши бла шагъырейленнгендиле. Мында уа алагъа аманлыкъ этилген жерде шагъатла къалай жыйылгъанларын ангылатхандыла, микроскопну, башха энчи оборудованияны кёргюзтгендиле. Жаш къонакъла криминалистни ишинде ууакъ затла болмагъанына тюшюннгендиле.
Сёзсюз, быллай тюбешиуле ёсюп келген тёлюге ич ишле органлада къуллукъ этиуню жууаплылыгъын ангыларгъа онг бередиле.
Тикаланы Фатима
хазырлагъанды.
