Кёп болмай КъМР-ни саулукъ сакълау министри Рустам Калибатов медицина организацияланы таматалары бла кенгеш бардыргъанды. Анда республикада саулукъ сакълауну айнытыу, ол санда регион проектлени бардырыу бла байламлы жетишимле, кемчиликле  да сюзюлгендиле. 
Жыйылыуда медицина оборудованияны, автотранспортну,  кёчюрюлюучю багъыу  комплекслени эм башха  затланы да тири эмда къыйматлы  хайырланыргъа керек болгъаны эсгертилгенди. Аллай  амал жамауатха медицина болушлукъ тапдырылырына заманында эм тийишли халда  себеплик этериги чертилгенди.  
Тюбешиуде  борчлу халда медицина строхование этиу жаны бла  комиссия белгилеген жумушла тынгылы толтурулурларына  эм ахча бла да жалчытылынырларына   аслам эс бурулгъанды. Ол тизмеге  стационарлада жатханла,  бийик технологиялы  медицина болушлукъ, диспансер халда къаралыргъа  эм диагностика этилирге керек болгъанла  да киредиле.   
Андан сора да, тюбешиуде «врач – врач» эм  «врач – пациент» деген халда телемедицина эсгертиуле да  тири хайырланыуну  эм бу жаны бла  ишни  игилендириуню  онглары  да  сюзюлгендиле.  
Ахырында Рустам Калибатов туура этилген кемчиликлени кетериуню битеу амалларын хайырланыргъа эм салыннган борчла болжалдан кеч къалмай толтурулургъа кереклисин къаты эсгертгенди.

Магометланы Сулейман.