Налшык, ЩIалэгъуалэм я унэм, щаублащ «Продвижение безопасности» урысейпсо кампанием и щIыналъэ Iыхьэр. Дызэрыт илъэсым щэкIуэгъуэм и кIэм нэсыху екIуэкIыну проектым къэралым и щIыналъэ 40 къызэщIиубыдэнущ - мурад нэхъыщ­хьэщ гъуэгу-транспорт къэхъукъащIэхэр зэхэкIыпIэхэм деж щыгъэмэщIэныр икIи а щIыпIэ гугъухэм тетхэр набдзэгубзаплъэу, пщIэ зэхуащIу щытыным къыхуеджэныр. 

МЫХЬЭНЭШХУЭ зиIэ Iуэхум теухуа пресс-конференцым хэтащ социальнэ кампанием и эксперт Корецкий Александр, КъБР-м щыIэ МВД-м и ГИБДД-м и управленэм и унафэщIым и къуэ­дзэ, полицэм и подполковник Гервик Вла­димир, КъБР-м щIалэгъуалэм я IуэхухэмкIэ и м­инистрым и къуэдзэ Ахъмэт Артур, рес­публи­кэм егъэджэныгъэмрэ щIэныгъэмкIэ и минис­т­рым и къуэдзэ Мысост Екатеринэ, ­КъБР-м Транспортымрэ гъуэгу хозяйствэмкIэ и министерствэм и къудамэм и унафэщI ­Къэгъэзэж Ислъам, КъБР-м щыIэ МВД-м дэлажьэ Жы­лагъуэ советым и лIыкIуэ ЛIы­хъурей Заур. 
2025 гъэм Къэбэрдей-Балъкъэрым и   гъуэгу зэхэкIыпIэхэм къэхъукъащIэу (ДТП) 159-рэ къыщыхъуащ, абыхэм цIыху 16 щыхэкIуэдащ, фэбжь зэхуэмыдэхэр ягъуэтащ цIыхуи 199-м. Сыт щыгъуи хуэдэу гъуэгу-транспорт къэхъу­къа­щIэхэм я нэхъыбэр зыкIэлъымыплъ зэб­лэ­кIыпIэхэм къыщохъу - 96-рэ (11 щыхэкIуэдащ, 113-м фэбжь ягъуэтащ). 2026 гъэм и ма­зитхум щIыналъэм и апхуэдэ щIыпIэхэм ДТП 56-рэ къыщыхъуати, цIыхуи 4 хэкIуэдащ, 72-м лей къатехьащ. 
- Апхуэдэ щIыпIэхэм къыщыхъу авариехэм кIэрыхуами, абыхэм шынагъуэншагъэр къыщызэгъэпэщыныр гулъытэ зыхуэщIыпхъэщ икIи а къалэныр гъэзэщIэным елъытащ цIыхухэм я гъащIэмрэ узыншагъэмрэ. Шынагъуэншагъэм зегъэIэтыныр къыщохъулIэнур гъуэгум тет дэтхэнэми хабзэр ткIийуэ ­игъэзащIэмэщ, апхуэдэуи профилактикэ лэжьыгъэ убгъуа ­ебгъэкIуэкIмэщ. Нобэ ди республикэм щежьэм хуэдэрщ, - жиIащ Гервик Владимир.
Ахъмэт Артур къыхигъэщащ илъэсым зэ­рыщIидзэрэ республикэм ЩIалэгъуалэм я IуэхухэмкIэ, Егъэджэныгъэмрэ щIэныгъэмкIэ, Транспортымрэ гъуэгу хозяйствэмкIэ и ми­нистерствэхэм, Къэрал автоинспекцэм зэщIы­гъуу республикэм и районхэмрэ къалэхэмрэ адэ-анэ мин 12 къызрихьэлIа зэIущIэ 20 зэрыщрагъэкIуэкIар. Сэбэп зыпылъ а Iуэхур фокIадэм зэтраублэжынущ. 
КъБР-м щыIэ кампанием и мурад нэхъыщхьэр, ныбжьым емылъытауэ, гъуэгум щы­зекIуэ псоми зэпрыкIыпIэхэм деж хабзэм тетын зэрыхуейр ягу къэгъэкIыжынырщ. Гулъытэшхуэ хуащIынущ сабийхэмрэ ныбжьыщIэхэмрэ ядэлэжьэным. 

ДЫГУЛЫБГЪУ Жантинэ.