Къабарты-Малкъарны Правительствосуну кезиулю кенгеши бюджет политика, инвестицияла, ырысхы бла байламлы халла, жамауат къоркъуусузлукъну жалчытыу эм талай башха соруулагъа жораланнганды.

Жыйылыуда этилген оноу бла республиканы быйылгъа эмда 2027-2028 жыллагъа бюджетине тюрлениуле кийирилгендиле. Алагъа кёре регионну казнасына  къаллай бир ахча тюшериги эмда  къоратыллыгъы тохташдырылады.
КъМР-ни финансла министри Елена Лисун билдиргенича, быйыл бюджетге налогла эмда башха тёлеуле бла энтта да 1,3 миллиард сом жыйыллыкъды,  ол санда республиканы иелигинде болгъан талай мюлкню сатыудан, табийгъат байлыкъланы къыйматлы хайырланыудан да. Аны бла регионнга   быйыл 73,7 миллиард сом  тюшерикди, къоранчла уа андан  кёбюрек боллукъдула. Башхалыгъы – ёнкючледиле,  аланы республика аз-аздан тёлеп бошар  умутлуду.
КъМР-ни Правительствосуну бла «Альфа Инвест» ООО-ну арасында этиллик келишимни да дурус кёргендиле. Ол Нальчикде уллу инвестициялы проектни тамамлауну юсюнденди. Сёз 2 гектар жерде ишленирик «5-жулдузлу» къонакъ юйню юсюнден барады. Аны къурулушуна жарым миллиард сомдан артыкъ къоратыллыкъды. Ол кеси да 2028 жылда битерикди. Жангы комплекс республиканы ара шахарыны туризм инфраструктурасына къошулуп, регионну бу жаны бла онгларын игилендирликди, деп ышанадыла аны къурагъанла.
Республиканы иелигинде болгъан  спорт-технологиялы оборудованияны бир кесегин Огъары Малкъаргъа берирге оноу этилгенди. Ол да элде асламлы спортну эмда физкультураны айныуларына себеплик этерикди. Дагъыда «КъМР-де правогъа бузукълукъланы болдурмау, жамауат низамны бла къоркъуусузлукъну кючлендириу» къырал программаны паспортуна тюрлениуле кийирилгендиле, тыш къыралладан чакъырыргъа боллукъ ишчилени санын  тохташдыргъан правительстволу комиссияны къаууму да жангыртылгъанды.

Улбашланы Мурат.