Белгилисича, мектепледе бла орта билим берген окъуу юйледе сабийлени араларында бир бирге зорлукъ этиу кенг жайылыпды. Бу жарсыу бла байламлы къыралда юсюбюздеги жылны март айында бардырылгъан ахыр тинтиуле ачыкълагъанларына кёре, акъылбалыкъ болмагъанланы бла жаш адамланы 53 проценти аллай артыкълыкъны сынагъанларын билдиргендиле. Сорулгъанланы 43 проценти уа аллай ишлеге къатышханларын, къарыусузуракъланы басынчакълагъанларын уялмай айтхандыла.
Аллай хал билим бериуде ишлегенлени жарсытмай болмайды. Аны бла байламлы сорууланы Чегем районну билим бериу управлениясы кёп болмай къурагъан тюбешиуде да сюзгендиле. Анга психолог, КъМКъУ-ну Юйретиу иш жаны бла управлениясыны къуллукъчусу Лейля Темирканова чакъырылгъан эди.
Ушакъны кезиуюнде Лейля Ибрагимовна зорлукъ этиу бир ненча къауумгъа юлешиннгенин ангылатханды. Ол билдиргеннге кёре, кюч бла, сёз бла басынчакълагъандан сора да, коллективде сабийни бырнак этиу да кенг жайылыпдыла. Жарсыугъа, кёп устазла аны эслемей, ангыламай къоядыла. Специалистни оюмуна кёре, аллай затла туура болгъанларындан сора, сабийле бла бир кере ушакъ этип къоймай, устазла бир ненча кере тюбешиуле бардырып, бу болумдан къутулур амалланы излерге, сюзерге борчлудула. Айтхан затларындан психолог кеси тюбеген шартладан юлгюле келтиргенди.
Ызы бла уа тюбешиуге къатышханлагъа борчла салгъанды. Аланы ала, къауумлагъа юлешинип, алай толтурургъа керек болгъандыла. Устазладан зорлукъну биринчи белгилерин ангылаугъа, ол жарсыуну кетериуге къалай къарагъанларын билдирирлери изленнгенди. Ол тюрлю амалланы ангылаудан, аланы хайырланыугъа ёте билиу а бек магъаналы болгъанды.
Устазланы бла специалистни араларында бардырылгъан ушакъгъа уа Чегем районну администрациясыны башчысыны орунбасары, билим бериу управленияны таматасы Жанна Арипшева да къошулгъанды. Ол, сюзюлген теманы магъаналылыгъын белгилеп, хар сабий да школгъа къоркъмай эм буюкъмай барырча этиу баш борчладан бири болгъанын чертгенди.
Тюбешиуню кезиуюнде устазла ишлеринде хайырланыргъа боллукъ кёп затны билгендиле, къаугъа башланнган кезиуледе къаллай амалла бютюн хайырлы боллукъларына да тюшюннгендиле.
Жыйылыугъа къатышханла быллай жарсыула болмаз ючюн, коллектив биригип ишлерге кереклисине энчи эс бургъандыла.
Ахырында хычыуун жумуш болгъанды: школланы директорларыны юйретиу жаны бла орунбасарлары ёсюп келген тёлю бла байламлы ишге уллу къыйын салгъанлары ючюн Чегем районну билим бериу управлениясыны сыйлы грамоталары бла саугъаланнгандыла.
Таппасханланы Аминат.
