КъБР-м и Iэтащхьэ КIуэкIуэ Казбек Правительствэм и Унэм дыгъуасэ щригъэкIуэ­-кIа зэIущIэм щIыналъэ егъэ­джэныгъэ IэнатIэм ехьэлIа Iуэхугъуэ куэдым щыхэп­лъащ. Гулъытэ хэха зыхуа­щIахэм ящыщщ Зыуэ щыт къэрал экзаменыр (ЕГЭ) мы гъэм зэрекIуэкIамрэ абы ­кърикIуахэмрэ. 

2025 - 2026 гъэ еджэгъуэм и кIэухыу ди республикэм и ­школхэм мы зэманым ще­кIуэкIа къэрал къэпщытэныгъэхэм ­хэтащ ныбжьыщIэ ми­-ни 5,2-м щIигъу. УщымыгуфIы­кIыу къа­нэркъым ЕГЭ-р зытахэм ящыщу цIыху 21-м къэп­щытэныгъэхэмкIэ балли 100 къызэрахьам. 11-нэ клас-сыр къэзыух­хэм ящыщу тIум предме­титIымкIэ балли 100 зырыз къахьащ. Къищы­нэ­мы­щIауэ, балл лъагэ (80 - 90) ЕГЭ-мкIэ къахьащ цIыху 1340-м. Ар мэхъу зытахэм я проценти   8,7-рэ. Нэгъабэ апхуэдэ школакIуэхэм я бжыгъэр проценти 5,8-рэ хъууэ арат. 
ЕГЭ-м кърикIуа псори нэсу хэIущIыIу щыхъунур бадзэуэ­гъуэм и 8-9-хэм щыIэну къэп­щытэныгъэхэм иужькIэщ. Ауэ республикэм и Iэтащхьэм къыхигъэщащ мы Iуэхугъуэхэр: 
- Гуманитар предметхэмкIэ, хабзэ хъуауэ, ди еджакIуэхэм щIэныгъэ лъагэ зэраIэр къагъэлъагъуэ сыт щыгъуи, атIэ­-ми къыхэзгъэщыну сыхуейщ: мыгъэрей къэпщытэныгъэхэм апхуэдэ ехъулIэныгъэфIхэр ныб­жьыщIэхэм зыIэрагъэхьащ физикэмкIэ, химиемкIэ, математикэмкIэ, информатикэм­-кIэ, географиемкIэ, - жиIащ КIуэкIуэ Казбек. - А предметхэмкIэ еджакIуэхэм щIэныгъэ куу къызэрагъэлъэгъуар, дауи, и фIыгъэщ егъэджэныгъэм и методикэ, техникэ лъабжьэхэр зэрыдгъэбыдам, зэредгъэфIэ­кIуам, адэкIэ зыхуеджэну я мурад IэщIагъэм епха щIэныгъэ курыт школым зэрыщедгъэ­гъуэтыфам, «Зыужьыныгъэм и къежьапIэ» IэнатIэхэр къызэ­рызэIутхам. Апхуэдэуи мыхьэ­нэшхуэ иIащ естественнэ щIэ­ныгъэхэр езыгъэдж IэщIагъэлIхэм дэIэпыкъуэгъу дазэ­рыхуэхъуами. 
ЗэIущIэм апхуэдэу щытеп­сэ­лъыхьащ школакIуэхэм я гъэмахуэ зыгъэпсэхугъуэ зэма­-ныр зэрекIуэкIымрэ ар адэкIи къызыхуэтыншэу къызэгъэ­пэ­щын зэрыхуеймри. ЩIына­-лъэм и пашэм нэхъапэм зэ­рыжиIамкIэ, ди республикэм и ныбжьыщIэ мини 10-м щIигъу къызэщIеубыдэ а Iуэхугъуэм. Махуэ зыбжанэ ипэкIэ лэжьыгъэр яухащ школхэм епхауэ щыта махуэ лагеру 47-м. А еджапIэхэм иджы щаублэнущ гъэ еджэгъуэщIэм зыхуэгъэ­хьэзырыным ехьэлIа лэжьыгъэхэр. Школ лагерхэм зыщагъэпсэхуащ сабий мини 3,3-м щIигъум. Ар хуэдищкIэ нэхъы­бэщ, нэгъабэрей бжыгъэхэм еплъытмэ. 
Мы зэманым республикэм иджыри щолажьэ апхуэдэ ла­герь 15. Псори зэхэту къапщ­тэмэ, сабийхэм я гъэмахуэ ­зыгъэпсэхугъуэм мы гъэм ху­хахащ сом мелуан 86-м щIигъу, республикэ мылъкум къыхэ­кIыу. Апхуэдэ гулъытэ псом япэу зыгъуэтыр бын куэд щапI унагъуэхэм ис сабийхэращ, СВО-м хэт ди лъахэгъухэм я бынхэращ, апхуэдэуи зи ­узыншагъэм сэкъат иIэхэмрэ ­адэ-анэ зыщхьэщымы­тыж­хэм- ­рэщ. 
ЩIыналъэм и Iэтащхьэм къыхигъэщащ сабийхэмрэ ныб­жьыщIэхэмрэ я гъэмахуэ зыгъэпсэхугъуэм набдзэгубза­п­лъэу зэрыхущытыпхъэр, ахэр ерыскъы тэмэмкIэ, шынагъуэншагъэкIэ къызэгъэпэщын, лагерхэм зэрыщыIэну зэманыр купщIафIэу, хьэлэмэту, нэгу­зыу­жьу ирахьэкIын зэрыхуей­-ри жиIащ. А лэжьыгъэхэр тэ­мэму езыгъэкIуэкIыпхъэхэми Iуэ­хум епха къалэнхэр  пщэ-рылъ яхуищIащ.