Зыуэ щыт къэрал экзаменхэм баллищэ къыщызыхьа ныб­жьыщIэхэмрэ урысейпсо олимпиадэхэм щытекIуахэм­рэ къыщыхэжаныкIахэмрэ яIу­щIащ КъБР-м и Iэтащхьэ КIуэкIуэ Казбек. Республикэм и унафэщIым Максым щиIэ напэкIуэцIым а зэIущIэм теухуауэ щитхащ:

«Дэтхэнэ зыми сыфIу­щIэну, сынывэпсэлъылIэну икъукIэ си гуапэщ.
Ди къэралышхуэм бжьыпэр щызыIыгъ ныбжьыщIэхэм зэ­рызахевгъэлъытар - ар икъукIэ ехъулIэныгъэшхуэщ! Ар еджапIэми зэрыщыту Къэбэрдей-Балъкъэрми я зэфIэкIыр къэ­зыгъэлъагъуэщ.
ИкъукIэ фIыщIэшхуэ яхузощI щIалэгъуалэм я егъэджа­кIуэ­хэм, гъэсакIуэхэмрэ адэ-анэ­хэмрэ - абыхэм я дэIэпыкъуныгъэ хэмылъу а лъагапIэм фы­нэсыфынутэкъым.
Махуэ къэс дэ яужь дитщ къытщIэхъуэ щIэблэр едгъэ­джэн папщIэ нэхъыфI псомкIи къызэрызэдгъэпэщыным. ЩIэ­ныгъэ зэгъэгъуэтын Iэмалыр псоми зэхуэдэу яIэн хуейщ. А къалэным зэпыууэ и нэIэ тригъэтщ ди Президент Путин ­Владимир Владимир и къуэм.
Къэбэрдей-Балъкъэрым ехъу­­лIэныгъэфIхэр иIэщ, ауэ дэ дыздынэсам дыкъыщыу­выIэну ди мурадкъым. АдэкIи едгъэфIэкIуэнущ школхэм щIэ­ныгъэ зэрыщрагъэгъуэт щIы­кIэр, егъэджакIуэхэм я лэ­жьы­гъэм и Iулыджыр къэт­Iэ­тынущ.
Ди зэпсэлъэныгъэм дэ дыкъыщытеувыIащ щIэныгъэ ­нэхъыщхьэ зэгъэгъуэтыным, медицинэм, архитектурэм, къалэухуэ, нэгъуэщI куэдми пы­щIа Iуэхухэм. И гугъу тщIащ хэкуп­сагъэм, дунейм къы­щыхъу зэ­пэщIэтыныгъэхэм - щIалэгъуа­лэм псори яфIэгъэщIэгъуэнщ!
Курыт еджапIэр къэзыуха ди ныбжьыщIэхэм си гум къыбгъэдэкIыу сохъуэхъу я мурад дахэхэр къехъулIэну.
Шэч къытесхьэркъым: фэ фщыщ дэтхэнэми зи лэжьыгъэм хуэIэзэ IэщIагъэлI къыф­хэкIынущ икIи Къэбэрдей-­Балъкъэрыр адэкIи ефIэ­кIуэ­ным, абы нэхъри зиужьыным хэлъ­хьэныгъэ хуэфщIынущ.
ЕхъулIэныгъэ фиIэну си гуа­пэщ!»