Къабарты-Малкъарны Жамауат палатасыны советини жыйылыуунда кёп сабийли юйюрлеге болушуу, жаш тёлюню саулукъларын кючлеу эмда юйюр хазнаны сакълау жаны бла къаллай мадарла этилгенлерин сюзгендиле. Жыйылыугъа сейирлери болгъан министерстволаны бла органланы келечилери къатышхандыла.

Палатаны башчысы Хазратали Бердов чертгенича, республикабызда «Юйюр» миллет проектни тийишлисича тамамлаугъа уллу къыйын салынады. Аны чегинде кёп сабийли юйюрлеге тутхучлукъ этиледи, жаш адамланы сабий табыу жаны бла саулукъларына къаралады. Анядан сора да, тири эмда узакъ ёмюрлюлюкню жалчытыугъа, абадан жыл сандагъы адамлагъа болушуугъа да эс бурулады, дегенди ол.

Жыйылыуда билдириуле бла урунуу эм социал къоруулау министрни орунбасары Диана Далова, жарыкъландырыу эм илму министрни орунбасары Екатерина Мисостова, маданият министрни орунбасары Рита Таова, Саулукъ сакълау министерствону Перинатал арасыны баш врачыны орунбасары Инна Мамхегова сёлешгендиле.

Диана Далова быллай шартла келтиргенди: «Юйюр» миллет проектни чегинде республикабызда юч башламчылыкъ толтуруладыла: «Юйюрлеге болушлукъ», «Кёп сабийли юйюрле», «Абадан тёлю». Алагъа кёре кёп сабийлилеге, сакъат балалары болгъанлагъа, аскерчилеге, энчи аскер операциягъа къатышханлагъа эм аланы юйюрлерине болушлукъ тапдырылады. Бюгюнлюкге  сабий туугъан 2 626 юйюрге 11111,3 минг сом тёленнгенди, балалагъа осуйлукъ этгенлеге коммунал жумушла ючюн тёлеулени жартысы къайтарылгъанды,  школгъа дери билим бериу учреждениялагъа тёлеуле ючюн да ата-аналагъа битеу да 47 052,89 минг сом берилгенди. «Кёп сабийли юйюр» проектни толтуруугъа быйыл 467 391,88 минг «Абадан тёлю» проектге уа 127 791,90 минг сом бёлюннгенди. Абадан жыл санда эм сакъат адамлагъа узакъ болжалны ичинде къарау мындан арысында да, алгъадача, бардырыллыкъды.

Инна Мамхегова «Аналыкъны эм сабийликни къоруулау» проектни тамамлау эмда перинатал арада аналагъа бла къагъанакълагъа къарау жаны бла иш къалай къуралгъаны бла шагъырейлендиргенди. Алай бла республикабызда къагъанакъланы 66-70 проценти арада тууадыла, керек болса, алагъа  шёндюгюлю амалланы хайырлана болушлукъ этиледи, артда ауруула чыкъмазгъа профилактикагъа эс бурулады, кече-кюн да акушер эм неонатальный бригадала хазырлыкъда турадыла. Андан тышында, телемедицина амал да игилигин кёргюзтгенди. Реанимация акушер къауумну терк халда чакъырыу, 2017-2025 жылла бла тенглешдиргенде, 2,2 кереге азайгъанды, ол а баладан ауурлукълары болгъан тиширыулагъа къайгъырыу бийик даражада къуралгъанына, медицина болушлукъ айныгъанына шагъатлыкъ этеди.

Екатерина Мисостова уа миллет проектде сабийлени школгъа дери юйретиуге уллу магъана берилгенин чертгенди. Ол айтханыча, 2017 жылдан бери 3-7 жыллары толгъан, керек болса уа, андан да абаданлагъа школгъа дери билим алыуда тыйгъыч жокъду. Ата-аналагъа таплыкъгъа сабий садла ишлерин эрттенликде, сагъат жетиде башлайдыла, ингирде уа 19:00 сагъатха дери аланы эшиклери ачыкъды. Къыралныкъы болмагъан сабий садла бла байламлыкъла тохташхандыла, 2026 жылны 14 майыны тарихлерине кёре, аллай 7 мекямгъа 441 бала жюрюйдюле. 1-4-чю классланы окъуучуларына окъуу кюнню кёбейтиуню амалы кийирилгенди, алада 5 525 сабий билим аладыла.

Рита Таова Маданият  министерство маданият мекямланы жангыртыу эмда жангыларын ишлеу, аланы мюлк-техника онгларын игилендириу, халкъ чыгъармачылыкъны айнытыу жаны бла уллу иш тамамлагъанын белгилегенди. «Этилген мадарланы хайырындан фахмулу сабийлеге себеплик этиледи, ала хунерлерин не къадар ахшы болумлада айнытырча онгла къуралгъандыла. Быйыл «Юйюр хазна эмда маданиятны инфраструктурасы» проектни тамамлаугъа 415,8 миллион сом бёлюннгенди, ол санда федерал бюджетден 396,7 миллион», - дегенди ол. 

Палатаны башчысыны орунбасары Людмила Федченко министерствола бу жаны бла бардыргъан ишге бийик багъа бергенди. Ахырында сейирлери болгъан органлагъа эсгертиуле жарашдырылгъандыла.

Кульчаланы Зульфия