КъМР-ни Башчысы Казбек Коков Минеральные Воды шахарда бардырылгъан PRO ЯБЛОКО деген алмаланы эм жемишлени ёсдюрюу, сакълау эм сатыу-алыугъа жораланнган сегизинчи Халкъла аралы кёрмючге къатышады. Кёрмючню ишине КъМР-ни Эл мюлк министерствосуну эм терек бахчачылыкъ бла кюрешген предприятияланы келечилери да къатышадыла. Республиканы предприятияларыны стендинде эл мюлкде уруннганланы жетишимлери, ол санда гитче терекчикледен тебиреп, аланы салгъанда эм ёсдюргенде хайырланнган затла да бардыла, деп билдириледи КъМР-ни Башчысыны MAX-да каналында.
Халкъла аралы кёрмючню ахырында терек бахчачылыкъны айнытыугъа жораланнган битеуроссей жыйылыу болгъанды. Анда бу бёлюмню аллында тургъан борчла белгиленнгендиле эмда Россей Федерацияны аш-азыкъ бла къоркъуусузлугъун жалчытыуда белгиленнген кёрюмдюлени толтуруу бла байламлы соруула сюзюлгендиле. Россейни Президенти салгъан миллет борчлагъа кёре, ата журтлу биригиуле алмала эм жемишле бла толусунлай къыралны кереклерин жалчытыргъа керекдиле.
Жыйылыуну Россей Федерацияны Эл мюлк министерствосу къурагъанды эм бардыргъан да ала этгендиле. РФ-ни эл мюлк министри Оксана Лут форумну ишине къатышханлагъа алгъышлау сёзюн ийгенди. Къыралны терек бахчачылыгъын айнытыу бла байламлы алчы специалистлери докладла этгендиле. Андан сора «Тирликни терк берген бахчачылыкъны мардалары» деген федерал эришиуде хорлагъанланы саугъалагъандыла.
Къабарты-Малкъар Республика терек бахчачылыкъны айнытып, андан алгъан тирлиги бла къыралда алчыланы санындады. Озгъан жыл 1,104 миллион тонна алмаладан эм тюрлю-тюрлю жемишледен жыйылгъан тирлик алыннганды. Башхача айтханда, озгъан жылда алыннган тирликни ёлчеми саулай Россейде жыйылгъан алмаладан бла жемишледен 23 процентни тутханды. Тюрлю-тюрлю иеликлери болуп республикада ёсдюрюлген тирликни ёлчеми уа саулай къыралда жайылгъан тирлик бла тенглешдиргенде, 36 процентден атлагъанды.
Андан сора да, бизни регион кёп жылланы тирлик берип турлукъ терекчиклени ёсдюрюу жаны бла беш алчы регионну санына киреди. Арт беш жылны ичинде 6,5 минг гектар жерге орнатылгъандыла аллай терекчикле, дагъыда 2025 жылда 1,8 минг гектарда тирликни терк берген терекле салыннгандыла. Бюгюнлюкде сертификатлары болгъан 17 питомник ишлейди, ала озгъан жылда 4,2 миллион терек ёсдюргендиле.
Белгилерчады, республика тирликни сакъларча шёндюгюлю заманны излемине келишген иги кесек жерни да хазырлагъанын, бюгюнлюкде бир ызгъа 362,7 минг тонна тирликни иги кесек заманнга сакъларча онгла къуралгъандыла.
Озгъан жылда терек бахчачылыкъны айнытыргъа къырал болушлукъ 1,4 миллиард сомдан аслам болгъанды. Быйылгъы жылда къырал болушлукъ 1,5 миллиард сом боллукъду.
Къабарты-Малкъарны агропромышленный комплексине тутхучлу себеплик этип тургъанлары ючюн, РФ-ни Эл мюлк министерствосуну ишчилерине, ол санда Оксана Николаевнагъа, жюрек ыразылыгъымы билдиргенме. Терек бахчачылыкъны айнытыу бла байламлы битеу бёлюмледе кёрюмдюлени игилендирир муратдабыз. 2030 жылгъа битеу да сагъынылгъан бёлюмде чыгъарылгъан тирлик 1,2 миллион тоннадан атларгъа керекди, продукцияны сакъларча онгларыбыз да 700 тоннадан аслам боллукъдула, деп айтылады билдириуде.
