Жерлени хайырланыуда инновацияла: агроинженерияны эмда къурулушну тамблагъысын Къабарты-Малкъар къырал аграр университетде ойлагъандыла. Анда бу кюнледе бардырылгъан битеуроссей конференциягъа къатышхан экспертле агропромышленность бёлюмде жангы амалланы излеу бла кюрешгендиле. Соруула инновациялы технологияла, къурулушда къыйматлылыкъны кючлендириу, табийгъатны тап халда тутуу эмда агроинженерия бла байламлы эдиле, деп билдиргендиле вуздан.
Конференцияны эки сыйлы датагъа атагъандыла: университет ачылгъанлы – 45 эмда КъМР-ни биринчи Президенти Валерий Коков туугъанлы 85 жыл толгъанына.
Вузну ректору Заурбий Шхагапсоев шёндюгю дунияда бир-бирде болгъан билим бла ачыкъ шагъырейлениу къурулуш эмда агроинженерия бёлюмлени айнытхан баш кючледен бири болгъанын чертгенди. Ызы бла башланнган пленар кенгеш да аны туура этгенди. Анга къатышхан экспертле, ол санда РосНИИ-ни гидротехника бёлюмюню башчысы Олег Баев, К.А.Тимирязев атлы аграр университетни доценти Василий Фартуков, КъМКъАУ-ну келечилери Къазийланы Валерий бла Индира Микитаева мелиорацияда, жерчиликде, къурулушда кёп тюрлю жарсыуланы юслеринден хапарлагъандыла. Аланы сюзюуге ВГИ-ни, Роскадастрны, КъМР-де Кёп фатарлы юйлеге тынгылы ремонт этиу жаны бла операторну эмда талай башха ведомствону башчылары эмда келечилери къатышхан эдиле.
Тематикалы ушакълада да бир-бир чурумланы сюзюп, аладан къутулур амалланы ойлагъандыла. Экологияда къоркъуусузлукъгъа, табийгъатны тийишлисича хайырланыугъа энчи эс бурулгъанды. Этилген оноула эмда рекомендацияла Къабарты-Малкъарны агроинженерия бёлюмюне хайырлы болуруна бу конференцияны къурагъанла ишексиздиле.
Улбашланы Мурат.
