Къырал магъаналы байрамланы белгилеу бла байламлы Къабарты-Малкъарны Жамауат палатасында 14 жыллары толгъан жаш адамлагъа паспортларын къууанчлы халда бериу ахшы тёреди. Тюнене да, Россейни кюнюню аллында, республиканы шахарларындан бла районларындан окъуучула, кадетле эм магъаналы документлерин атлары айтылгъан адамланы къолларындан алгъандыла.
Сыйлы жумушну палатаны башчысы РФ-ни эл мюлкюню сыйлы къуллукъчусу Хазратали Бердов, аны орунбасарлары - илмуланы доктору профессор Людмила Федченко бла Парламентни юч чакъырылыууну депутаты, кёп ведомстволу эм халкъла аралы саугъалагъа тийишли болгъан Тюменланы Мурадин, Къабарты-Малкъарда МВД-ны Миграция жаны бла управлениясыны башчысыны орунбасары полицияны подполковниги Руслан Сокуров толтургъандыла.
Эм алгъа Россейни гимни эшитилгенди, ызы бла палатаны консультаты Тёппеланы Асият сабийлеге Россейни кюню жаш, алай эм магъаналы байрамладан бири болгъанын эсгертгенди, аны тарыхы бла шагъырейлендиргенди.
Жаш адамлагъа паспортларын бере, Хазратали Бердов аланы бу такъыйкъаланы унутмазгъа чакъыргъанды.
- Хар инсанны да жашауунда ёмюрде эсинден кетмезлик кюнлери боладыла, бюгюн сиз деменгили къыралыбызны толу эркинликли гражданлары боласыз. Паспортугъузну алгъан кезиу эсигизде къалыр, деп алай сунама. Мени быллай кюнледе быллай насийхат этген тёрем барды: биринчиден, ата-анагъызны, жууукъларыгъызны сюйюгюз, сизге жашауну ала саугъалагъандыла, жашагъан ёмюрюгюзде алагъа хурмет этигиз. Экинчиден а, гитче эм уллу Ата журтугъузну, Къабарты-Малкъарны бла Россейни багъалагъыз. Тышында жашау игирекди дегенлеге ийнанмагъыз, киши жеринде сизге тыш адамгъача къарарыкъдыла, туугъан жеригизде айныргъа итинигиз. Сиз алыкъа окъургъа, жюрегигиз излеген усталыкъны сайлап, анда ёсерге керексиз. Жашаулу болугъуз, узакъ ёмюр, жетишимле, насып тежейме, - дегенди Хазратали Александрович.
Людмила Федченко да къыралны гражданини болууну сыйлылыгъын белгилегенди: «Россей сейир тарыхы, бай маданияты, кёп миллетлилиги бла деменгили къыралды. Аны инсаны болуу, эркинликле бергени бла бирге уллу жууаплылыкъ да салады. Ата журтугъузгъа аяулу кёзден къарагъыз, керек сагъатда аны къорууларгъа хазыр болугъуз, тынгылы окъугъуз, заман жетгенде, бет жарыкълы урунугъуз».
- 14 жыл ол кёпмюдю, азмыды? Насыплы, узакъ, ариу жашау алда болгъанын эсге алсакъ, кёп тюйюлдю, алай гитче сабийчикледен быллай умутландыргъан жашла бла къызла ёсгенлерин тергесег а, алай аз кёрюнмейди. Аны ючюн сизни ата-аналарыгъыз, устазларыгъыз, къыралыгъыз уллу къыйын салгъандыла, терен билим алып, ишигизде айырмалыланы санына къошулуп, ол къыйынны алай къайтарыргъа кюрешигиз. Жашау жолугъуз огъурлу болсун! – дегенди Тюменланы Мурадин.
Руслан Сокуров да, башда айтылгъан тежеулеге къошула, Жамауат палатагъа жаш адамланы кёллерин былай кётюргени ючюн ыразылыгъын билдиргенди.
Алай бла байрам кюн паспортларын Идар Афаунов, Мурат Абазов, Дамир Балкаров, Оракъланы Малика, Артём Тохов, Руслан Кумыков эм башхала алгъандыла. «Биринчилени атламлары» битеуроссей къымылдауну регион бёлюмю уа алагъа саугъагъа документлерине тышла бла белгиле бергенди. Аны келечиси Астемир Шомахов жаш адамлагъа къымылдау алагъа болушургъа къачан да хазыр болгъанын айтханды.
Алгъа жылладача, бюгюн да къууанчлы жыйылыу бирге суратха тюшюу бла бошалгъанды.
Кульчаланы Зульфия.
Сурат авторнуду
