КъМР-ни Башчысы Казбек Коков Нальчикни жер-жерли администрациясында шахар округну школларыны директорлары бла тюбешгенди, деп билдиргендиле регионну оноучусуну МАХ-да энчи каналында.
Ишчи ушакъны кезиуюнде муниципалитетни билим бериу бёлюмюн айнытыуну магъаналы сорууларына жууапла изленнгендиле.
Белгиленнгенича, ахыр къырал сынаула бара турадыла: устазланы бла окъуучуланы 10-жыллыкъ къыйынларыны эсеплери чыгъарыладыла, ызы бла школну бошагъан жаш тёлю жашауну жангы кезиуюне – усталыкъ алыугъа – атларыкъдыла.
Школла уа жангы окъуу жылгъа хазырланып башлагъандыла – мекямланы ичлери бла тышлары, тийрелери да тап халгъа келтириледиле.
Сёз ючюн айтханда, шахарда арт жыллада миллет проектлени себепликлери бла беш школ ишленнгенди, 7-сине да тынгылы ремонт этилгенди. Бюгюнлюкде саулай республикада да 43 школда жангыртыу ишле бардырыла турадыла.
Нальчикде саулай да 34 школ, 10 прогимназия бла 47 сабий сад бардыла. Школгъа дери билим берген учреждениялагъа – 15 минг чакълы жашчыкъ бла къызчыкъ, школлагъа да 38 мингден аслам сабий жюрюйдюле.
Къошакъ билим бериуню юсюнден айтханда, аны бла 32 минг окъуучу жалчытылынады. Ол а шахарда жыл санлары бешден атлагъан сабийлени битеу саныны 73 проценти чакълы бирди.
«Точка роста» билим бериу араладан, спортклубладан, школ театрладан, музейледен 35-си ачылгъандыла.
Школланы барысында да «Биринчилени атламлары» битеуроссей биригиуню биринчи бёлюмлери къуралгъандыла.
Тюбешиуню кезиуюнде билим бериу учрежденияланы ырысхы-техника онгларын кючлендириуню, окъуу китапланы санын ёсдюрюуню, устазланы иш хакъларын кётюрюуню, алада къагъыт ишни азайтыуну амаллары бла онглары сюзюлгендиле.
«Сабийле тышындан келген терс ниетлеге алданмазларына, аланы аманлыкъ ишледен сакълаугъа артыкъда уллу эс бурулгъанды. Бу ишде, айхай да, школланы бла ата-аналаны байламлыкъда ишлеулери бек магъаналыды. Юйретиу къыйматлы болур, акъылбалыкъ болмагъанланы эмда жаш адамланы араларында аманлыкъ ишлени болдурмаз ючюн битеу онгланы хайырланыргъа керекди. Осал къылыкълыланы уа хар бири бла да энчи ишлерге, башха-башха амалла табаргъа тийишлиди.
Школчулада бла студентледе экстремизм эмда нацизм ниетлеге къажау сезимле къурарча мадарла этиуню магъанасы да уллуду. Сабийлерибизни окъургъа, жаш тёлю жамауат ишге кёллендирсек, тюрлю-тюрлю кружоклагъа бла спорт секциягъа жюрюрча эталсакъ, Ата журтха сюймеклик ниетде юйретсек, аланы къорууларгъа къолубуздан келликди», – дегенди Казбек Коков.
Юсюпланы Галина
хазырлагъанды
