Быйыл "Россети Северный-Кавказ" -"Каббалкэнерго" биригиуню специалистлери ток урланнганы бла байламлы 94 шартны ачыкълагъандыла. Аны чеклеринде 1,6 миллион  киловатт-сагъат тас болгъанды. Ахчагъа  кёчюргенде, аны багъасы  8,9 миллион сом болады. Сёз ючюн, сагъынылгъан электрокюч бла Атажукино элде жашагъан алты мингнге жууукъ  адамны  эки ай чакълы жалчытыргъа боллукъ эди.

Саулай алып айтханда, бузукълукъланы асламысы неда 89-су  токну эсеплеген приборсуз хайырланнганлары бла байламлыды. Дагъыда беш абонент  биригиу бла келишим этмей сетьлеге къошулгъандыла. Аланы хар бири бла байламлы  законодательствону чеклеринде иш ачылгъанды. Алай бла токну урлагъанла Административ бузукъланы кодексини 7.19-чу статьясына тийишлиликде (Сетьлеге эркинликсиз къошулгъанла эм токну эсеплеген приборсуз хайырланнганла) тазир тёлерикдиле. Аны ёлчеми энчи иелилеге - 10-15 минг,  организациялагъа уа 100-200 минг сомгъа жетеди. Андан сора да, бир-бир аманлыкъчыла РФ-ни Уголовный кодексини 165-чи статьясына кёре, эки жылгъа тутулургъа да боллукъдула.

Экинчи кере эркинликсиз ток ызгъа къошулгъан энчи иеге 15-30 минг сом тазир тёлерге тюшерикди. Аллай бузукълукъ этген организациягъа уа аны ёлчеми 300-400 минг сомгъа жетеди.

- Энергокючню  урлагъан ток бла жалчытхан биригиуге уллу къоранч салады.  Аны бла бирге  уллу хатагъа келтирирге да боллукъду. Кеслери алларына къалай болса да тартылгъан  ток чыбыкъла   ёртенни къозгъаргъа, адамны саулугъуна хата салыргъа эм  къыйыры къоншулагъа окъуна жетерге боллукъду,- деп билдиредиле «Россети Северный Кавказ» биригиуде хайырланыучуланы эслерине сала.   

Ток ызлагъа эркинликсиз къошулгъанланы неда башха бир тюрлю бузукълукъ этилгенини юсюнден «Россети» биригиуню "къызыу ызына" сёлешип билдирирге боллукъду: 8-800-220-0-220  неда 220. 

Магометланы Сулейман.