Къабарты-Малкъар къырал аграр университетни «Единство» волонтёр арасы ветеринария медицина эм биотехнологияла факультетни мурдорунда «Зооволонтёрла» деген бёлюм ачханды. Жангы къымылдауну мураты — къыйын болумгъа тюшген жаныуарлагъа хар жаны бла да себеплик этиудю, дагъыда студентлени хауле жаныуарланы къыйынлыкъларыны эм аланы тамамлау амалланы юсюнден ангылауларын ёсдюрюудю, деп билдиргендиле вуздан.

Жангы къымылдауну къууанчлы халда ачыу жыйылыугъа университетни окъуучулары, факультетни келечилери эмда «Четыре лапы» приютдан келген къонакъла къатышхандыла. Анда зооволонтёрланы муратларын эм борчларын туура этгендиле, энди боллукъ акцияланы, проектлени, сора студентлеге ачылгъан онгланы юсюнден да хапарлагъандыла.

«Четыре лапы» приютну келечиси Алия Аль-Сайг кеси да сагъынылгъан факультетде окъуйду. Ол ишлеген жерини жашауундан тарыхла бла шагъырейлендиргенди, жыйылыугъа къатышханланы барын да бир акъыллы болгъан адамланы къауумуна къошулургъа чакъыргъанды, хайырлы байламлыкъла къуралырына ышаннганын билдиргенди.

«Зооволонтёрла» къымылдау ачылгъаны университетни жаныуарлагъа жууаплы эм къайгъырыулу кёзден къараргъа юйретиу борчун толтуруу жаны бла этилген сезимли атламды. Ол хар студентге жан сакълаугъа кесини юлюшюн къошаргъа, тёгерекдеги дунияны бираз игирек эмда огъурлу этерге берилген онгду.

«Жаныуарланы къыйынлыкъларына уллу кёллю болмагъан студентлени «Зооволонтёрланы» къауумуна къошулургъа чакъырабыз! Бу башламчылыкъ болушургъа, окъургъа, айныргъа эм керти ахшы ишле этерге сюйгенлеге тийишли эшиклени ачады», - дегендиле жыйылыуну ахырында.

Улбашланы Мурат.