Быйыл тёртюнчю июньда къыркъ бир жыл болгъанды КъМАССР-ни халкъ поэти, Ленин атлы саугъаны лауреаты Къулийланы Къайсын дуниясын алышханлы. Ол кюн КъМР-ни Парламентини, Правительствосуну, район администрацияланы келечилери, поэзияны сюйгенле, таматала, сабийле да Къулийланы Къайсын атлы проспектде поэтни эсгертмесини аллында жыйылгъандыла. Ала барысы да поэтге баш урургъа, жюрек ыразылыкъларын билдирирге келген эдиле.
Къайсынны назмулары жылдан-жылгъа магъаналарын тас этмегенлей, бюгюнлюкде барыбызгъа да жол нёгерле болгъанлай турадыла. Ала къыйын кюнюбюзде жапсарадыла, къууанч кюнлерибизде да кёп насыплы сезимлерибизни Къайсынны тизгинлери бла толусунлай ачыкълайбыз. Хау, назмула кёпле жазадыла, алай жаланда фахмулуланы тизгинлери ётедиле заманны сынауундан. Къулийланы Къайсынны бийик поэзиясы ёмюрледе жашарыгъы барыбызгъа да баямды. Миллионла бла адамла аны назмуларына жазылгъан жырланы жырлайдыла. Миллионла бла окъуучула Къайсынны чыгъармаларыны юслери бла туугъан жерни багъаларгъа, Ата журтха кертичи болургъа юйренедиле. Кавказны жигит эм фахмулу поэти кёргюзтгенди дуниягъа жашауу бла: поэтни жууаплыгъы энчиди. Къайсын фронтда жанын аямагъанды, фашистледен жерибизни сакълагъанланы кёллендиргенди, кишилиги таурухлагъа киргенди. Аны бла бирге жигит поэт чексиз халал болгъанды, кимге да жан аурута билгенди.
Тёредеча, эсгериу жыйылыуну школчула ачхандыла, ала поэтни назмуларын окъугъандыла. Ызы бла КъМР-ни маданият министри Мухадин Кумахов: «Биз бюгюн Къайсынны поэзиясын, аны ёлюмсюз философиясын эсгеребиз», - дегенди. Кертиси бла да, Къайсынны поэзиясы – философия дунияды. Хар кюнюбюз аманлыкъны бла игиликни арасында сайлау болгъанын айтханды поэт. Урушну кюйсюзлюгюн сынагъан, мамырлыкъгъа чакъыргъанды. Сюймекликни – сыйлы сезимни – суратлагъанды, ариулукъну кёрюрге юйретгенди. Къайсын – устазыбызды.
КъМР-ни Парламентини башчысыны орунбасары Жанатайланы Салим керти поэтле ёлмегенлерин чертгенди: аланы назмулары айтылып турадыла. Къайсынны чыгъармачылыгъы ёлюмсюз болгъанына заман шагъатлыкъ этеди. «Жыл сайын бу майданда эм Чегемде поэтни юйюнде школчула закий поэтни назмуларын кёлден айтадыла, бу тёре бир заманда да къурумасын», - дегенди.
Жамауат ишчи эм китап басмачы Мария Котлярова поэтни проза сёз бла жазылгъан чыгъармаларыны юслеринден айтханды. Ол чертгенди: биз алыкъа Къайсын къойгъан жазмаланы тинтирге, ангыларгъа керекбиз. «Бюгюн Москвада китап ярмарка ачылгъанды. Анда Къайсынны китаплары да боллукъдула», - дегенди.
КъМР-ни Парламентини маданият, граждан обществону айнытыу эм информация политика комитетини башчысы Текуланы Амырбий поэт малкъар халкъны намысын, сыйын кючлендиргенин, миллетни атын айтдыргъанын белгилегенди. Къулийланы Къайсын хар таулу адамны ёхтемлигиди. КъМР-ни Жазыучуларыны союзуну башчысыны орунбасары Лариса Маремкулова да поэтни чыгъармачылыгъыны юсюнден айтханды.
Чегем муниципал районну советини таматасы Хасанш Одижев жыйылгъанланы Чегемде Къулийланы Къайсыннга бла Алим Кешоковха салыннган эсгертмеге, ызы бла Къайсынны Юй-музейине чакъыргъанды. Белгилисича, Къайсын бла Алим урушда да, мамыр жашауда да чынтты шуёхла болгъандыла: Алим жаралы Къайсынны сермеш таладан чыгъаргъанды, жанын сакълагъанды. Къайсын а, Алимни романын сёкгенлеринде, жазыучуну ызындан болгъанларында, кесини профессионал сёзюн айтханды, аны къоруулагъанды. «Мен Къайсын бла кёп кере тюбешгенме, Маданият юйде халкъны аллында сёлешиучю эди. Бек акъыллы, кючлю адам эди. Чегем районда поэтни аты бла отуз юч спорт турнир бардыргъанбыз», - дегенди Хасанш Одижев.
«Бирлик» жамауат биригиуню башчысы Сумайланы Ахмат Къайсынны назмуларын айтханды, аны чыгъармачылыгъы битеу халкълагъа да магъаналы болгъанын чертгенди.
Тукъумну атындан Къулийланы Малик бла Мустафир сёлешгендиле. Ала жыл сайын поэтге сый-хурмет этерге жыйылгъан халкъгъа жюрек ыразылыкъларын билдиргендиле.
Эсгериу жыйылыуну ахырында поэзиягъа табыннганла, акъ сёзню ангылагъанла Къайсынны эсгертмесине гюлле салгъандыла. Ызы бла жыйылгъанла поэтни Чегем шахарда Юй-музейине атланнгандыла.
Байсыланы Марзият.
Суратла авторнудула.
